შეერთებული შტატების პრეზიდენტის, დონალდ ტრამპის განკარგულება, რომელიც მის მთავარ სავაჭრო მრჩევლებს დაავალდებულებს გამოიძიონ სავარაუდოდ, უსამართლო სავაჭრო შეთანხმებები ჩინეთთან, ორ ქვეყანას შორის ურთიერთობებს „მოწამლავს“, აცხადებს ჩინეთის სახელმწიფოს დაფინანსებით გამომავალი გაზეთი, ორშაბათის ნომერში, როგორც ამას „როიტერსი“ იტყობინება.

ტრამპის ადმინისტრაციის ერთ-ერთმა უმაღლესმა ოფიციალურმა პირმა შაბათს განაცხადა, რომ პრეზიდენტი ორშაბათს, მოგვიანებით გამოსცემს განკარგულებას რათა გამოძიებულ იქნას ჩინური სავაჭრო წესები და ინსტრუქციები, რომელიც ჩინეთში მოქმედ შეერთებული შტატების ფირმებს ინტელექტუალური ქონების გადაცემას აიძულებს.

აღნიშნული ნაბიჯი, რაც საბოლოოდ ჩინურ საქონელზე ტარიფების მკვეთრ ცვლილებას გამოიწვევს, იმ დროს იდგმება, როცა ტრამპმა სთხოვა ჩინეთის ლიდერს, ქსი ძინპინგს უფრო მეტი იღონოს ჩრდილოეთ კორეის ბირთვული სარაკეტო პროგრამის შესაჩერებლად, მაშინ როცა თავად არ გამორიცხავს სამხედრო ქმედებებს ფხენიანის წინააღმდეგ.

სარედაქციო წერილში ინგლისურენოვანმა ოფიციალურმა ჩინურმა გაზეთმა, „China Daily“-მ განაცხადა, რომ გადამწყვეტია, ტრამპის ადმინისტრაციამ არ მიიღოს ნაჩქარევი გადაწყვეტილება, რომელიც შეიძლება ინანოს.

„თუ მხედველობაში მივიღებთ ტრამპის ბიზნესგარიგებით მიდგომას საგარეო საქმეებისადმი, შეუძლებელია ანგარიში არ გაეწიოს მის მზარდ იმედგაცრუებას იმ კუთხით, რასაც იგი მიიჩნევს ჩინეთის წარუმატებლობად კორეის სახალხო დემოკრატიული რესპუბლიკის გარკვეულ სიტუაციაში მოქცევის თვალსაზრისით“, წერს ინგლისურენოვანი ჩინური გაზეთი და განაგრძობს:

„მაგრამ, შეერთებული შტატების ინტერესების წინ წაწევის ნაცვლად, პოლიტიზებული ვაჭრობა მხოლოდ გაამწვავებს ქვეყნების ეკონომიკურ განსაცდელებს და მოწამლავს ჩინეთ-ამერიკის ყოვლისმომცველ ურთიერთობას“.

ტრამპის ადმინისტრაციის ოფიციალური პირი დაჟინებით ირწმუნება, რომ ჩრდილოეთ კორეაზე დიპლომატია და პოტენციური სავაჭრო გამოძიება „სრულიად ერთმანეთთან კავშირის არმქონე“ საკითხებია და აცხადებს, რომ სავაჭრო ქმედება არ წარმოადგენს ზეწოლის ტაქტიკას.

The China Daily-მ განაცხადა, რომ უსამართლობაა ტრამპის მხრიდან ტვირთი აჰკიდოს ჩინეთს ფხენიანისთვის მისი ქმედებების გადათქმევინებაში.

„პეკინისთვის იმის დაბრალების მცდელობით, რომ იგი კორეის სახალხო დემოკრატიული რესპუბლიკის ბირთვული აგრესიის თანამონაწილეა და მისთვის ბრალის დადება იმაში, რომ წარუმატებელია, რაც არსებითად ყველა დაინტერსებული მხარის წარუმატებლობაა, ტრამპი სერიოზული შეცდომის დაშვების რისკის ქვეშ იმყოფება იმ თვალსაზრისით, რომ ხლეჩს საერთაშორისო კოალიციას, რომელიც წარმოადგენს საკითხის მშვიდობიანად გადაწყვეტის საშუალებას“, აღნიშნავს გაზეთი.

„იმედს ვიტოვებთ, რომ ტრამპი სხვა გზას გამონახავს. საკითხები კიდევ უფრო მეტად გართულდება თუკი პეკინი და ვაშინგტონი ერთმანეთის წინააღმდეგ იქნებიან მიმართულნი“.