საქართველოს პრემიერ-მინისტრ ირაკლი ღარიბაშვილის განცხადებით, ინფრასტრუქტურისა და მდგრადი განვითარების მინისტრ დავით შავლიაშვილს სერიოზული თანდაყოლილი დაავადება აღმოაჩნდა, რაც, მის მიერ თანამდებობის დატოვების მიზეზი გახდა.


ღარიბაშვილის განცხადებითვე, შავლიაშვილმა თანამდებობის დატოვების თხოვნით მას დაავადების აღმოჩენისთანავე მიმართა, თუმცა საქართველოში არსებული რთული ვითარების გამო, მან მინისტრის პოსტზე დარჩენა და პირველი კვარტალის მუშაობის წარმატებით დასრულება გადაწყვიტა.


„თანამდებობის დატოვების მიზეზი არის ის, რომ მას თანდაყოლილი ძალიან სერიოზული დაავადება აღმოაჩნდა. ეს დეკემბერში გამოვლინდა, როდესაც მას პირველი შეტევა ჰქონდა. ამის შემდეგ, მან 4 თვის განმავლობაში რამდენჯერმე მომმართა თხოვნით, რომ გადამდგარიყო, მაგრამ ვინაიდან ლარის დევალვაციიდან გამომდინარე, საქართველოში რთული ვითარება იყო, ასევე ძალიან მნიშვნელოვანი იყო ჩვენთვის, რომ პირველი კვარტალი ძალიან წარმატებულად დასრულებულიყო, მან მიიღო გადაწყვეტილება, რომ არ გადამდგარიყო და პირველი კვარტალი მართლაც წარმატებით დასრულდა. შეგახსენებთ, რომ მის სამინისტროს 107%-იანი შესრულება ჰქონდა, რაც მისი დამსახურება იყო“, - განაცხადა ირაკლი ღარიბაშვილმა.


ღარიბაშვილის განცხადებითვე, შავლიაშვილის გადაწყვეტილება მისთვის საწყენია, თუმცა დააკმაყოფილებს მას, რადგან საქმე მის ჯანმრთელობას ეხება.


„მიუხედავად იმისა, რომ მეწყინა, მე გავიზიარე და რა თქმა უნდა, მას ვეღარ დავაძალებდი და ვეღარ ვთხოვდი, რომ დარჩენილიყო და მუშაობა გაეგრძელებინა, რადგან ეს მის ჯანმრთელობას შეეხებოდა“, - განაცხადა პრემიერმა.


დავით შავლიაშვილმა თანამდებობიდან გადადგომის თხოვნით საქართველოს პრემიერ-მინისტრ ირაკლი ღარიბაშვილს დღეს მიმართა. როგორც ინფრასტრუქტურის სამინისტროს მიერ გავრცელებულ განცხადებაშია ნათქვამი, გადაწყვეტილება დავით შავლიაშვილის ჯანმრთელობის მდგომარეობის გაუარესებამ გამოიწვია.