ესპანეთის ქალაქ ბარსელონას ცენტრში მიკროავტობუსი ხალხის ჯგუფში შევარდა. ინციდენტის ადგილას პოლიციაა მობილიზებული. ინფორმაციას Reuters-ი ავრცელებს.

ინციდენტი ტურისტულ ზონაში, რამბლასში მოხდა. ესპანური მედია პოლიციაზე დაყრდნობით იტყობინება, რომ დაღუპულია სულ მცირე 1 ადამიანი, დაზიანებები აქვს მიღებული ათეულობით ადამიანს. პოლიციამ მომხდარი შეაფასა, როგორც ტერაქტი. 

ესპანური მედია თვითმხილველებზე დაყრდნობით წერს, რომ ინციდენტის რაიონში სროლების ხმა ისმის. სხვა ცნობის თანახმად, ორმა შეიარაღებულმა მამაკაცმა ქალაქის ერთ-ერთ რესტორანში მძევლები აიყვანა.

სოციალურ ქსელ „ტვიტერში“ ვრცელდება ვიდეოები, სადაც ჩანს რომ ხალხი პანიკაშია და აქეთ-იქეთ გარბის.

გაზეთი „ელ პაისი“ წერს, რომ ხალხისთვის ფურგონის შეჯახების შემდეგ მძღოლი ფეხით გაიქცა.

საზოგადოებრივი მაუწყებლის, RTVE-ს მიერ გავრცელებულ ფოტოზე ჩანს, რომ სამი ადამიანი ქუჩაში ასფალტზე წევს და მათ პოლიცია ეხმარება.

დაშავებულთა ზუსტი რაოდენობა ამ დროისთვის არ სახელდება, თუმცა El Periodico-ს ინფორმაციით დაზიანებები სულ მცირე 20 ადამიანს აქვს მიღებული. ადგილზე პოლიციასთან ერთად სასწრაფო დახმარების ჯგუფებიც არიან მობილიზებული. 

„ასოშიეთედ პრესის“ ცნობით, პოლიციამ ინციდენტის მიმდებარე ტერიტორია კორდონებით შემოსაზღვრა და ფართო ქუჩის მაღაზიები დაკეტა. მათ ხალხს მოუწოდეს მოერიდონ მიმდებარე ადგილებს. ოპერაციაში ვერტმფრენია ჩართული.

რამბლასი ბარსელონაში ტურისტების მთავარი თავშეყრის ადგილია და იქ უმეტესად ხალხმრავლობაა.