„ლეიბორისტული პარტიის“ წარმომადგენლები სემეკის სხდომათა დარბაზში არიან შეკრებილნი, მჯდომარე აქციას მართავენ და სემეკის წევრებს სხდომის განახლების საშუალებას არ აძლევენ.

პარასკევს, დილას ხმაურით დაწყებული სხდომა რამდენჯერმე შეწყდა და სხდომათა დარბაზში „ლეიბორისტული პარტიის“ ლიდერის, შალვა ნათელაშვილის გამოჩენის შემდეგ ვითარება განსაკუთრებით დაიძაბა. მდგომარეობის განმუხტვა ვერც საპატრულო პოლიციის ჩარევის შემდეგ მოხერხდა.

„როგორც სიყვარული მთავრდება ლოგინით, აი ისე ეს პროცესი მთავრდება გაძვირებით ყოველთვის. თქვენი მოსატყუებელი კბილი, კაი ხანია მოვიცვალეთ“, განაცხადა სემეკში მისულმა ნათელაშვილმა, რის შემდეგაც ის მის თანაპარტიელებთან ერთად სკანირებდა - „შეწყვიტეთ!“„შეწყვიტეთ!“„შეწყვიტეთ!“

სიტყვიერი დაპირისპირებისა და სხდომის ჩაშლის შემდეგ შალვა ნათელაშვილმა სემეკის სხდომათა დარბაზში, თანაპარტიელებთან ერთად, მჯდომარე აქცია წამოიწყო და მოუწოდა თბილისის მოსახლეობას, რომ მივიდნენ სემეკის შენობაში და არ მისცენ საშუალება დენის ტარიფი გაიზარდოს.

„მეტი გზა არ არის“, განაცხადა ნათელაშვილმა იატაკზე დაჯდომის შემდეგ“. „აი, ახლა ვინც მიყურებს სამზარეულოდან, რესტორნიდან, თავისი სამუშაო ადგილიდან, ყველას მოვუწოდებ, მოვიდნენ აქ, მარეგულირებელ კომისიაში ჯერ და მერე მივადგეთ იქ, სადაც მისადგომია. მე მივმართავ ახლა ხეგლეჯია ივანიშვილს, კრიმინალს, მილიარდერს, მატყუარას და გადამგდებს. ხომ ჰპირდებოდი ხალხს დენის ტარიფის გაიაფებას, გაზის ტარიფის გაიაფებას, სად არის ეს დაპირება? სად არის, გაეცი ხალხს პასუხი, გამოდი ბუჩქებიდან. დღეს შენი დასასრულის დასაწყისია“, განაცხადა შალვა ნათელაშვილმა, რომელმაც მოსახლეობას „ივანიშვილის ტრანსფორმატორზე გაკვრისკენ“ მოუწოდა. 

ნათელაშვილის აღნიშნული განცხადებიდან მალევე საპატრულო პოლიციამ „ლეიბორისტული პარტიის“ ლიდერს და მის თანამებრძოლებს სემეკ-ის დარბაზი ძალის გამოყენებით დაატოვებინა.