ტაიბეიში მამაკაცი დააკავეს, რომელმაც პრეზიდენტის სასახლის გარეთ სამურაის ხმლის გამოყენებით სამხედრო პოლიციის თანამშრომელი დაჭრა.

დამნაშავემ, გვარად ლუ, როგორც ამტკიცებენ, ხმალი მუზეუმიდან მოიპარა. ის ჩინეთის დროშას ატარებდა და პოლიციას განუცხადა, რომ პოლიტიკური შეხედულებების გამოხატვას აპირებდა.

BBC-ის ცნობით, დაჭრილი მცველი საავადმყოფოში გადაიყვანეს. ამჟამად მისი მდგომარეობა სტაბილურია.

ტაივანი თვითგამოცხადებული ქვეყანაა, მაგრამ მას პეკინი მის მოწყვეტილ პროვინციად მიიჩნევს, რომელიც ერთ დღეს ჩინეთის სახელმწიფოს შემადგენლობაში იქნება მოქცეული.

პოლიციის ოფიციალურმა პირებმა ახალი ამბების სააგენტო AFP-ს განუცხადეს, რომ 51 წლის ლუმ ხმლის მოსაპარად ჩაქუჩი გამოიყენა, რათა ისტორიის მუზეუმში გაეტეხა ყუთი, რომელშიც სამურაის ხმალი იყო.

დაცვის თანამშრომლებმა დამნაშავე სასახლის შესასვლელთან შენიშნეს. როდესაც მის შეჩერებას შეეცადნენ, ლუმ ერთ-ერთი მათგანი მოპარული ხმლით მხარში დაჭრა.

პოლიციის თქმით, მისი მოტივი უცნობია, თუმცა მის ზურგჩანთაში ჩინეთის დროშა იპოვეს.

ოფიციალურმა პირმა განაცხადა: „მან თქვა, რომ პრეზიდენტის ოფისში შესვლით მისი პოლიტიკური შეხედულებების გამოხატვა სურდა“.

ტაივანის თავდაცვის მინისტრმა, ფენგ ში-კუანმა განაცხადა, რომ სასახლეში ინციდენტის დროს მისი ოჯახის წევრები იმყოფებოდნენ. მინისტრი მადლობას უხდის დაცვის პოლიციის თანამშრომლებს.

„წარმოდგენაც მიჭირს რა მოხდებოდა, მას რომ სასახლეში ხმლით შეეღწია“, განუცხადა მინისტრმა რეპორტიორებს.