აგვისტოს თვის მხოლოდ პირველ ორ კვირაში 3,800 მიგრანტზე მეტმა უკანონოდ გადაკვეთა კანადის პროვინცია კვებეკის საზღვარი.

BBC-ს ცნობით, ეს რაოდენობა ოთხჯერ აღემატება ივნისის თვეში შეერთებული შტატებიდან კანადაში ჩასული თავშესაფრის მაძიებელთა რაოდენობას.

ამ თვეებში კანადაში მიგრანტების მკვეთრად გაზრდილი რაოდენობა შეინიშნება, განსაკუთრებით ფრანგულ ენაზე მოლაპარაკე პროვინციებში.

კანადის ფედერალური და პროვინციის ოფიციალური პირები მიიჩნევენ, რომ მიგრანტების ნაკადის ასეთი ზრდა კანადის თავშესაფრების შესახებ მედიის მიერ გავრცელებული არასწორი ინფორმაციის შედეგია.

კანადის იმიგრაციის დეპარტამენტის წარმომადგენელმა, ლოის დუმასმა განაცხადა: „კანადაში თავშესაფრის თხოვნა არ იძლევა კანადაში მუდმივად ცხოვრების გარანტიას და ძალიან მნიშვნელოვანია ამის ხაზგასმა“.

კანადაში ჩასულების უმრავლესობა ჰაიტიდან არის და ისინი შეერთებულ შტატებში კანონიერად ცხოვრობდნენ.

მაისში, შეერთებული შტატების პრეზიდენტმა, დონალდ ტრამპმა განაცხადა, რომ აშშ შეწყვეტდა პროგრამას, რომელიც ახანგრძლივებდა დეპორტაციისაგან დროებით დაცვას ჰაიტის მოქალაქეებისათვის, მას შემდეგ რაც 2010 წელს, იქ გამანადგურებელი მიწისძვრა მოხდა. აღნიშნული დაცვის პროგრამას ვადა 2018 წლის იანვარში გასდის.

მონრეალმა დროებით თავშესაფრად თავისი ოლიმპიური სტადიონი გახსნა, რათა უეცრად გაზრდილი თავშესაფრის მაძიებლები შეიფაროს.

კანადელმა სამხედროებმა ბანაკები ააშენეს, რათა დროებით შეეფარათ მიგრანტები, სანამ მათი განაწილება მოხდებოდა კანონდამცველების და იმიგრაციის ოფიციალური ორგანოების მიერ.

კვებეკში, პლატსბურგთან ახლოს არსებული თავშესაფარი 500-ზე მეტ მიგრანტს შეიფარებს.

ფედერალურმა სატრანსპორტო მინისტრმა, მარკ გარნეუმ განაცხადა, რომ მთავრობა სიტუაციას აკონტროლებს, მიუხედავად იმისა, რომ სიტუაცია „უჩვეულოა“.

1 იანვრიდან 31 ივლისამდე 7,500-ზე მეტმა მიგრანტმა გადაკვეთა კანადის საზღვარი, მათ შორის 6,360 კვიბეკში ჩავიდა და დევნილის სტატუსის მიღება მოითხოვა.