რუსეთის პრეზიდენტმა ვლადიმერ პუტინმა ამერიკის შეერთებულ შტატებში რუსეთის ახალი ელჩის, ანატოლი ანტონოვის დანიშვნის ბრძანებულებას მოაწერა ხელი.

ანტონოვი სერეგეი კისლიაკს შეცვლის, რომელიც აშშ-ში ელჩის პოსტზე 2008 წლიდან მუშაობს.

ინფორმაციას „რია ნოვოსტი“ ავრცელებს.

„დაინიშნოს ანატოლი ივანეს ძე ანტონოვი რუსეთის ფედერაციის საგანგებო და სრულუფლებიან ელჩად ამერიკის შეერთებულ შტატებში და ვაშინგტონში ამერიკული სახელმწიფოს ორგანიზაციების რუსეთის ფედერაციის მუდმივ დამკვირვებლად“, ნათქვამია ბრძანებულების ტექსტში.

ანტონოვი ამ დრომდე რუსეთის საგარეო უწყებაში მაღალ თანამდებობაზე მუშაობს. უფრო ადრე  რუსეთის თავდაცვის მინისტრის მოადგილის პოსტზე მსახურობდა. იგი კარიერული დიპლომატია.

ანტონოვი 1955 წელს დაიბადა. იგი პოლიტიკურ მეცინიერებათა დოქტორია, გააჩნია საგანგებო და სრულუფლებიანი ელჩის რანგი.  ფლობს ინგლისურ

და ბირმანულ ენებს.

ამერიკაში თითქმის 9 წლის განმავლობაში მოღვაწე ელჩი კისლიაკი ტრამპის საარჩევნო კამპანიის სკანდალში გაეხვა. ამერიკული პრესა მასზე, როგორც რუსეთის ინტერესების მძლავრად გამტარებელზე წერდა. ტრამპის ეროვნული უსაფრთხოების მრჩეველი მაიკლ ფლინი თანამდებობიდან მას შემდეგ წავიდა, რაც თეთრმა სახლმა განაცხადა, რომ ფლინმა სრულად არ მოუყვა ამერიკულ სპეცსამსახურებს კისლიაკთან საუბრის შინაარსი.

აშშ-ის მასობრივი ინფორმაციების საშუალებები სპეცსამსახურების ანონიმურ წყაროებზე დაყრდნობით ასევე წერდნენ, რომ კისლიაკი „დაზვერვის თანამშრომელი“ და ე.წ. დამვერბოვკებელი იყო.