დაბა წაღვერში პრემიერ მინისტრის თავმჯდომარეობით გამართული საგანგებო შტაბის სხდომის დასრულების შემდეგ გიორგი კვირიკაშვილმა განაცხადა, რომ ცეცხლის დასახლებულ პუნქტებზე, მათ შორის არც დაბა ბაკურიანში გავრცელების საფრთხე და „პანიკის საფუძველი არ არსებობს“ და შტაბის მიერ შემუშავებული სამი ფრონტის მიმართულებით, სამშაბათს, გამთეენიიდან ბორჯომის მუნიციპალიტეტის სოფელ დაბის მიმდებარე ტერიტორიაზე ხანძრის წინააღმდეგ ბრძოლა მეზობელი სახელმწიფოების ტექნიკის დახმარებით ერთიანი ფრონტით განახლდება.

„რამდენიმე კრიტიკული ფრონტია გამოყოფილი, მძლავრი ტექნიკა უკვე ადგილზეა, მობილიზებულია ამ წუთას. დილის 6 საათამდე იმ ზონებში, სადაც არის გავრცელების საშიშროება, გზები იქნება ორგანიზებული, როგორც კი ინათებს ცოცხალი ძალის მობილიზებაც გაკეთებული გვაქვს და როგორც სახანძრო, ასევე საავიაციო ტექნიკით ერთდროულად დავიწყებთ, სამი კრიტიკული ზონა არის - ეს არის ახალი გაშენებული ტყის ზონა, თორტის მიმდებარე ტერიტორიაზე, ეს არის წაღვერთან მიმდებარე სერი, სადაც უნდა ლოკალიზება გავაკეთოთ, რომ არ გავრცელდეს ცეცხლი და ეს არის სოფელი დაბა, სადაც ნაკლები საშიშროებაა გამომდინარე იქედან, რა დინამიკაც გვაქვს ამ მომენტში. სამივე ამ ფრონტზე ცოცხალი ძალაც ორგანიზებულია, ტექნიკა არის მობილიზებული, უკვე ადგილზეა ის ბულდოზერები, რომლებიც გაიყვანენ გზებს და არანაირი საჭიროება იმისა, რომ ცოცხალი ძალა, მოხალისეები, ახლა მოვიდა ინფორმაცია, რომ აპირებენ ჩამოსვლას, ამის საჭიროება არ არსებობს.

„ბაკურიანში დამსვენებლებს არაფერი არ ემუქრებათ და ხაზგასმით მინდა ვთქვა, რომ იქ დამსვენებლებმა არ ინერვიულონ იმიტომ, რომ იქითკენ გავრცელების საშიშროება არ არსებობს და ასევე, არანაირი პანიკის საფუძველი არ არსებობს. ჩვენ მთლიანდ ვაკონტროლებთ ამ დროისთვის სიტუაციას, დილისთვის ვემზადებით, დილაზე ვიმუშავებთ ტექნიკის საშუალებით, დილას ყველა საშუალებით ერთდროულად შევუტევთ ამ სამივე ფრონტს“, განაცხადა კვირიკაშვილმა, რომლის თქმითაც დილას დაზუსტდება მთლიანი ტექნიკის რაოდენობა, რაც ჩაერთვება ხანძრის ჩაქრობის პროცესში და „მაქსიმალური დახმარება“ იქნება მეზობელი სახელმწიფოების მხრიდან.