საგარეო საქმეთა მინისტრის თამარ ბერუჩაშვილის განცხადებით, მნიშვნელოვანია ქვეყნებმა, იმ პროგრესისა და ძალისხმევის ჩვენება მოახერხონ, რომელიც გასწიეს.

ბერუჩაშვილის განცხადებით, ამ მხრივ შეხვედრაზე განსაკუთრებულად სამი ქვეყანა – საქართველო, მოლდოვა და უკრაინა გამოიყო და აღნიშნა, რომ ამ ქვეყნებმა ძალიან მნიშვნელოვანი რეფორმები გაატარეს.

ამის შესახებ საგარეო საქმეთა მინისტრმა ლუქსემბურგში „აღმოსავლეთ პარტნიორობის” საგარეო საქმეთა მინისტრთა რიგით მეექვსე შეხვედრის დასრულების შემდეგ განაცხადა.

„მნიშვნელოვანია,ის პროგრესი და ძალისხმევა ვაჩვენოთ, რაც ქვეყნებმა გასწიეს. განსაკუთრებულად აღინიშნა სამი ქვეყანა – საქართველო, მოლდოვა და უკრაინა, რომელთაც არა მხოლოდ ხელი მოაწერეს ასოცირების ხელშეკრულებას და მისი განხორციელება დაიწყეს, არამედ პარალელურად, ძალიან მნიშვნელოვანი რეფორმები გაატარეს”, – განაცხადა თამარ ბერუჩაშვილმა.

ლუქსემბურგში გამართულ შეხვედრას საგარეო საქმეთა და უსაფრთხოების პოლიტიკის საკითხებში ევროკავშირის უმაღლესი წარმომადგენელი ფედერიკა მოგერინი თავმჯდომარეობდა.

მინისტერიალში მონაწილეობა ევროპული სამეზობლო პოლიტიკისა და გაფართოების მოლაპარაკებათა საკითხებში ევროკომისარმა იოჰანეს ჰანმა, „აღმოსავლეთ პარტნიორობის” ექვსი პარტნიორი ქვეყნის, ასევე ევროკავშირის წევრი ქვეყნების საგარეო საქმეთა მინისტრებმა და მაღალი რანგის ოფიციალურმა პირებმ ამიიღეს. მინისტერიალს ასევე, ევროპის საინვესტიციო და ევროპის რეკონსტრუქციისა და განვითარების ბანკების წარმომადგენლები ესწრებოდნენ.

ქართულ დელეგაციას შეხვედრაზე საგარეო საქმეთა მინისტრი თამარ ბერუჩაშვილი ხელმძღვანელობდა.

შეხვედრის მთავარი თემა აღმოსავლეთ პარტნიორობის რიგის სამიტი იყო.

შეხვედრაზე ასევე, აღმოსავლეთ ევროპული პარტნიორების მიმართ ევროკავშირის პოლიტიკის გაძლიერების სამომავლო პერსპექტივები განიხილეს.