ბორჯომის მუციპალიტეტის სოფელ დაბის მიმდებარე ტერიტორიაზე მასშტაბური ხანძრის სალიკვიდაციოდ შექმნილმა საგანგებო შტაბმა მორიგი სხდომა გამართა, რომლის დასრულების შემდეგაც რეგიონული განვითარებისა და ინფრასტრუქტურის მინისტრმა ზურაბ ალავიძემ მედიას განუცხადა, რომ ამ ეტაპზე მოსახლეობის ევაკუაციის საჭიროება დღის წესრიგში არ დგას და წუხანდელთან შედარებით უფრო საიმედო მდგომარეობაა, თუმცა ყველაფერი ამინდზე იქნება დამოკიდებული.

საგანგებო შტაბის მიერ გავრცელებულ განცხადებაში კი აღნიშნულია, რომ ცეცხლის კერების სალიკვიდაციო ოპერაციაში დილიდან კვლავ ავიაცია ჩაერთვება და არსებულ საავიაციო სატრანსპორტო საშუალებებს თურქეთიდან გამოგზავნილი სპეციალური სამაშველო თვითმფრინავი და ბელორუსული ვერტმფრენიც შეუერთდება.

„ხანძრის სალიკვიდაციოდ შექმნილი საგანგებო შტაბი, ამ დროისთვის ბორჯომის ხეობაში არსებულ ვითარებას აფასებს. საქართველოს პრემიერ-მინისტრი შტაბის წევრებთან და შესაბამისი უწყებების ხელმძღვანელებთან ერთად მიმდინარე და დაგეგმილ მოქმედებებს განიხილავს.

სტიქიის სამ კერაზე გარკვეული მონაკვეთების ლოკალიზება მოხერხდა, თუმცა ხანძრის მასშტაბი მაინც დიდი რჩება. ამ დროისთვის მუშაობას აგრძელებს მძიმე ტექნიკა, მეხანძრეები და მაშველები ხანძრის ჩაქრობას მთელი ღამის მანძილზე გააგრძელებენ. დილიდან კი ცეცხლის კერების სალიკვიდაციო ოპერაციაში კვლავ ავიაცია ჩაერთვება. აზერბაიჯანისა და თურქეთის რესპუბლიკის მთავრობების მიერ გამოგზავნილ ვერტმფრენებს, თურქეთიდან გამოგზავნილი სპეციალური სამაშველო თვითმფრინავი და ბელორუსული ვერტმფრენიც შეუერთდება.

შტაბის წევრები იღებენ ინფორმაციას ატენის ხეობაში გაჩენილი ხანძრის შესახებ. პრემიერ-მინისტრის დავალებით ხეობაში უკვე გაიგზავნა მძიმე ტექნიკა და ცოცხალი ძალა“, ნათქვამია საგანგებო შტაბის მიერ ახლახან გავრცელებულ ინფორმაციაში.