პრეზიდენტი გიორგი მარგველაშვილი, რომელიც ბორჯომის ხეობაში ხანძრის სალიკვიდაციო სამუშაოების გაცნობის მიზნით რამდენიმე საათის წინ ჩავიდა, საქართველოს მეგობარ ქვეყნებს დახმარებისთვის მადლობას უხდის.

როგორც მან ჟურნალისტებთან საუბრისას აღნიშნა, რთულ მომენტში გამოჩნდა, თუ რამდენი გულწრფელი მეგობარ ჰყავს საქართველოსა და ქართველ ხალხს.

„ჩვენ დავინახეთ რამდენი გულწრფელი მეგობარი ჰყავს საქართველოს. რამდენი გულრწრფელი მეგობარი გვყავს ქართველებს: სომხები, აზერბაინელები, თურქები, ბელორუსები. პოზიცია დაფიქსირდა ჩვენი ევროპელი და ამერიკელი პარტნიორებისგან - ეს რა თქმა უნდა, ამ რთულ მომენტში, როდესაც იბრძვი იმისთვის, რომ არ იყოს ადამიანური, არ იყოს მატერიალური ზარალი, ამ მომენტში, რა თქმა უნდა, ძალიან სასიხარულო და მნიშვნელოვანია. დიდი მადლობა ჩვენ ყველა მეგობარს, რომელიც ასე ოპერატიულად გამოგვეხმაურა“, განაცხადა პრეზიდენტმა, რომელიც მიიჩნევს, რომ ხეობაში მასშტაბური ხანძრის შედეგად დამწვარი ტერიტორიის დამუშავებას დიდი დრო დსჭირდება.

„არეალიდან გამომდინარე, გრძელდება ძალიან ისეთი ინტენსიური სამუშაოები. ერთი არის რომ თქვენ ხედავთ, რომ ცეცხლი ამ წუთას ფაქტობრივად ლიკვიდირებულია, თუმცა, ამ ტერიტორიის ბოლომდე დამუშავებას ჯერ კიდევ ძალიან დიდი დრო სჭირდება და ადამიანები 24-საათიან რეჟიმში მუხლჩაუხრელად მუშაობენ. მადლობა მათ კიდევ ერთხელ“, აღნიშნა პრეზიდენტმა.

სტიქიური უბედურების ზონაში ჩასულ გიორგი მარგველაშვილს ხანძრის სალიკვიდაციო სამუშაოების შესახებ ინფორმაცია პრემიერ მინისტრმა, გიორგი კვირიკაშვილმა და საგანგებო შტაბის წევრებმა მიაწოდეს.