მთავრობის ადმინისტრაციაში დღეს, ევროპულ და ევროატლანტიკურ სტრუქტურებში ინტეგრაციის საკითხებში სახელმწიფო მინისტრმა დავით ბაქრაძემ და საქართველოში ევროკავშირის ელჩმა იანოშ ჰერმანმა, ხელი მოაწერეს შეთანხმებას, რომელიც საქართველოს, ასოცირების შეთანხმების პრიორიტეტების განხორციელებაში დაეხმარება.


კერძოდ კი, საქართველოს გარემოსდაცვით კანონმდებლობის გასაუმჯობესებლად და საჯარო უწყებების მუშაობის გამჭვირვალობის ხელშესაწყობად, ევროკავშირმა საქართველოს 8 მილიონი ევრო გამოუყო.


ევროკავშირის დახმარების ძირითად მიზანს, მოსახლეობისთვის გაუმჯობესებული მომსახურებისა და სერვისების მიწოდება წარმოადგენს.


აღნიშნული დახმარებით გათვალისწინებული პროგრამის ფარგლებში, საქართველოს საჯარო უწყებები ექსპერტულ დახმარებას მიიღებენ, რათა კონკრეტულ სექტორებში, თავიანთი მომსახურება დახვეწონ და გარემოსდაცვით სფეროში ევროპული გამოცდილების შესაბამისად კანონმდებლობა გააუმჯობესონ.


ამასთან, პროგრამის განხორციელების შედეგად, გარემოსდაცვით საკითხებთან დაკავშირებით, მოსახლეობისთვის გამჭვირვალე ინფორმაციის მიწოდებას შეეწყობა ხელი.


დახმარებას, ასევე, მონაცემთა გაცვლის სააგენტო, საქართველოს პარლამენტი და გენდერულ საკითხთა უწყებათაშორისი კომისია მიიღებს.


ევროკავშირს საქართველოსთვის, ასოცირების შეთანხმების, ღრმა და ყოვლისმომცველი თავისუფალი სავაჭრო სივრცის შესახებ შეთანხმებისა და სავიზო საკითხთა ლიბერალიზაციის შეთანხმების პრიორიტეტების შესრულების პროცესში, 20 მილიონი ევროს ოდენობით დახმარება უკვე გამოყოფილი აქვს.