ქარიშხალმა ტეხასის შტატში, როკპორტის აეროპორტი ნანგრევებად აქცია და გარკვეული დროის განმავლობაში აღნიშნულ აეროპორტს მუშაობა ექნება შეწყვეტილი, რადგან როგორც BBC იუწყება, ის მნიშვნელოვნად არის დაზიანებული.

პრეზიდენტმა ტრამპმა კაბინეტის წევრებთან ტელეკონფერენცია გამართა იმის განსახილველად, თუ როგორ უპასუხონ შტორმს.

თეთრი სახლის განცხადების მიხედვით, „პრეზიდენტმა ტრამპმა ხაზი გაუსვა მის მოლოდინებს, რომ ყველა დეპარტამენტი და სააგენტო რჩება სრულად ჩართული სტიქიის წინააღმდეგ ბრძოლაში და მხარს უჭერს მის ნომერ პრიორიტეტს - მოქალაქეთა სიცოცხლის გადარჩენას“.

მან მადლობა გადაუხადა „ბევრ მოხალისეს და ორგანიზაციას, რომლებიც თავიანთი ამერიკელი თანამემამულეების დახმარებისთვის ძალისხმევას და დროს არ იშურებენ“.

მძლავრი ქარიშხლის შედეგად ტეხასის შტატში დიდ წყალდიდობას მოელიან. ვარაუდობენ, რომ წყლის დონე 1 მეტრს მიაღწევს. შტატის დიდ ნაწილს ამ დროისთვის ელექტროენერგია არ მიეწოდება. 

ტეხასის შტატზე 50 წლის განმავლობაში ყველაზე მძლავრი შტორმის თავზე დატყდომის შედეგად სულ მცირე ერთი ადამიანი დაიღუპა და ქარიშხალი, რომელსაც თავსხმა წვიმა მოჰყვება, ახლა შტატს კატასტროფული წყალდიდობით ემუქრება. ინფორმაციას „როიტერსი“ ხელისუფლებაზე დაყრდნობით ავრცელებს.

მე-4 კატეგორიის ქარიშხალი „ჰარვი“ თავს შეერთებული შტატების ნავთობისა და გაზის ინდუსტრიის გულს, ტეხასს პარასკევს გვიან დაატყდა თავს, ქარის სიჩქარე საათში 209 კმ-ს აღწევს, რის გამოც მას 1961 წლის შემდეგ ყველაზე მძლავრი ქარიშხლის კატეგორია მიენიჭა.

ქარიშხალმა შენობებს სახურავები ახადა, ჩაწყვიტა ელექტროგადამცემი ხაზები, და ტორნადოები და წყალდიდობები წარმოშვა. იგი შესუსტდა და მას ახლა ტროპიკული შტორმის კატეგორია მიენიჭა, მაგრამ მოელიან, რომ ის ტეხასს რამდენიმე დღე შეუქმნის სერიოზულ პრობლემას და შტატს 102 სანტიმეტრ წვიმას მოუტანს. მოსახლოების დაახლოებით მეოთხედ მილიონს ელექტროენერგია არ მიეწოდება.

„როიტერსის“ ცნობით, ერთი ადამიანი ქალაქ როკპორტში საცხოვრებელ სახლში გაჩენილი ხანძრის შედეგად გარდაიცვალა.