ტეხასის შტატზე 50 წლის განმავლობაში ყველაზე მძლავრი შტორმის თავზე დატყდომის შედეგად სულ მცირე ორი ადამიანი დაიღუპა, დაზიანებები მიიღო სხვა თოთხმეტმა და ქარიშხალი, რომელსაც თავსხმა წვიმა მოჰყვება, ახლა შტატს კატასტროფული წყალდიდობით ემუქრება.

BBC-ის ცნობით, ტეხასის გუბერნატორმა გრეგ აბოტმა გააფრთხილა შტატის მოსახლოება „კატასტროფული“ წყალდიდობის შესახებ. მან თქვა, რომ ქალაქებში - ჰიუსტონსა და კორპუს კრისტიში უკვე 50სმ ნალექი მოვიდა წვიმის სახით და კიდევ 40 სმ ნალექის მოსვლაა ნაპროგნოზირები.

როგორც „რიოტერსი“ იტყობინება, მე-4 კატეგორიის ქარიშხალი „ჰარვი“ თავს შეერთებული შტატების ნავთობისა და გაზის ინდუსტრიის გულს, ტეხასს პარასკევს გვიან დაატყდა თავს, ქარის სიჩქარე საათში 209 კმ-ს აღწევს, რის გამოც მას 1961 წლის შემდეგ ყველაზე მძლავრი ქარიშხლის კატეგორია მიენიჭა.

ქარიშხალმა შენობებს სახურავები ახადა, ჩაწყვიტა ელექტროგადამცემი ხაზები, და ტორნადოები და წყალდიდობები წარმოშვა. იგი შესუსტდა და მას ახლა ტროპიკული შტორმის კატეგორია მიენიჭა, მაგრამ მოელიან, რომ ის ტეხასს რამდენიმე დღე შეუქმნის სერიოზულ პრობლემას და შტატს 102 სანტიმეტრ ნალექს მოუტანს წვიმის სახით. მოსახლოების დაახლოებით მეოთხედ მილიონს ელექტროენერგია არ მიეწოდება.

„როიტერსის“ ცნობით, ერთი ადამიანი ქალაქ როკპორტში საცხოვრებელ სახლში გაჩენილი ხანძრის შედეგად გარდაიცვალა.

„ასოშიეთედ პრესის“ ინფორმაციით კი მეორე ადამიანი, ქალბატონი, წყლის მაღალ დონეში მოქცეული ავტომანქანიდან გადმოსვლის შემდეგ გარდაიცვალა. მისი გარდაცვალების მიზეზი არ დასახელებულა. იგი მისმა მეზობლებმა თავისი ავტომანქანიდან დაახლოებით 27 მეტრის მანძილზე იპოვეს და იგი გარდაცვლილად გამოცხადდა ექიმის მიერ, რომელიც ინციდენტის ადგილას იმყოფებოდა.

როგორც BBC იუწყება, ამერიკის ერთ-ერთი უდიდესი ქალაქიდან, ჰიუსტონიდან, 4,500 პატიმრის სხვა ციხეში, აღმოსავლეთ ტეხასში ევაკუაცია მიმდინარეობს, რადგანაც მის ახლომდებარედ მდინარე ბრაზოსის კალაპოტში წყლის დონე მნიშვნელოვნად მატულობს.

სამაშველო სამუშაოებს ძლიერი ქარი ართულებს. ჯერჯერობით ზარალის სრული ოდენობა უცნობია, რადგან სამაშველო და საგანგებო სამსახურების ჯგუფები რთული მეტეოროლოგიური პირობების გამო ყველაზე უფრო მეტად დაზიანებულ ადგილებთან მისვლას ვერ ახერხებენ.

ქარიშხალმა ტეხასის შტატში, ქალაქ როკპორტის აეროპორტი ნანგრევებად აქცია და გარკვეული დროის განმავლობაში აღნიშნულ აეროპორტს მუშაობა ექნება შეწყვეტილი, რადგან როგორც BBC იუწყება, ის მნიშვნელოვნად არის დაზიანებული. როკპორტი სტიქიამ ყველაზე მეტად დააზარალა. ქალაქის გზები წაქცეული ელექტრო ბოძებითაა ჩახერგილი, დანგრეულია შენობები.

პრეზიდენტმა ტრამპმა კაბინეტის წევრებთან ტელეკონფერენცია გამართა იმის განსახილველად, თუ როგორ უპასუხონ შტორმს.

თეთრი სახლის განცხადების მიხედვით, „პრეზიდენტმა ტრამპმა ხაზი გაუსვა მის მოლოდინებს, რომ ყველა დეპარტამენტი და სააგენტო რჩება სრულად ჩართული სტიქიის წინააღმდეგ ბრძოლაში და მხარს უჭერს მის ნომერ პრიორიტეტს - მოქალაქეთა სიცოცხლის გადარჩენას“.

მან მადლობა გადაუხადა „ბევრ მოხალისეს და ორგანიზაციას, რომლებიც თავიანთი ამერიკელი თანამემამულეების დახმარებისთვის ძალისხმევას და დროს არ იშურებენ“.