ხუთი მთამსვლელი დაიღუპა და ერთმა სერიოზული დაზიანება მიიღო ავსტრიის ალპებში, კრიმლის სიახლოვეს.

5 სამაშველო ვერტმფრენი გაიგზავნა ინციდენტის ადგილისკენ, ზილერტალის ალპების მთათა არეში, რომელიც ზღვის დონიდან 2,000 მეტრ სიმაღლეზეა.

როგორც BBC იუწყება, ხელისუფლების თქმით, ინციდენტის ზუსტი მიზეზი უცნობია, მაგრამ ექვსი ადამიანი, რომლებიც თოკების მეშვეობით ადიოდნენ მთაზე, როგორც ჩანს, ერთად მოწყდნენ.

მხოლოდ ერთი გადარჩა და იგი ზალცბურგში, 80 კმ.-ის მანძილზე მდებარე ქალაქის ერთ-ერთ საავადმყოფოში გადააფრინეს.

ოფიციალური პირების განცხადებით მთამსვლელები მანლკარსჩარტის ხეობის დაბლა იმყოფებოდნენ, იმ ადგილას, სადაც მეწყერების რისკები მაღალია.

„ჩვენ ვფიქრობთ, რომ შესაძლოა თოკის სათანადოდ დამაგრება ვერ მოხერხდა და ის მოირყა“, განაცხადა „წითელი ჯვრის“ მაშველთა გუნდის ხელმძღვანელმა ანტონ ვოიტოფერმა.

დაღუპულთა ვინაობა და ეროვნება ამ ეტაპზე არ დასახელებულა.

მიიჩნევენ, რომ აღნიშნული ინციდენტი ყველაზე საშინელია ჯერჯერობით, ამ სეზონზე, ავსტრიის ალპებში, სადაც რამდენიმე ათეული მთამსვლელი იღუპება ყოველწლიურად.

სხვა ტრაგიკული ინციდენტისას სამი იტალიელი ალპინისტი დაიღუპა იტალიის ალპებში, მყინვარზე ტრენტოსთან ახლოს, ადემელო ბრენტა პარკში.

Associated Press-ის ცნობით, ორი მათგანი მყინვარის ნაპრალში ჩავარდნის შედეგად ადგილზევე დაიღუპა, მესამე მაშველებმა ცოცხალი ამოიყვანეს, მაგრამ მოგვიანებით გარდაიცვალა.

ისინი 9-კაციან ჯგუფთან ერთად ადიოდნენ მყინვარზე და ერთად იყვნენ მიბმული, და მათმა ექვსმა თანამგზავრმა, ყველამ დაზიანებები მიიღო.

შაბათს კი, კიდევ ერთი იტალიელი მთამსვლელი შვეიცარიის საზღვრის სიახლოვეს, ვალტელინას ხეობაში კლდის ნატეხების ცვენისას დაიღუპა.