„ერთიანი ნაციონალური მოძრაობის" თბილისის მერობის კანდიდატის, ზაალ უდუმაშვილის განცხადებით, დედაქალაქის მთავრობა მერიაში არსებული „მახინჯი ბიუროკრატიული სისტემის" წყალობით, „წურბელებივით აზის თბილისელებს".

როგორც უდუმაშვილმა თბილისის მერიის წინ გამართულ ბრიფინგზე განაცხადა, მერიისა და საკრებულოს მაღალჩინოსნებმა, „საკუთარი კეთილდღეობისთვის", ბოლო სამი წლის განმავლობაში, 235 მილიონი ლარი დახარჯეს.

მისი ინფორმაციით, აღნიშნული თანხიდან, 137 მილიონი ხელფასებზე, დანამატებსა და პრემიებზე დაიხარჯა.

„ახლა მე ვდგევარ თბილისის, ჩვენი მაჟორიტარების გუნდთან ერთად. იმ გუნდთან ერთად, რომელთან ერთადაც, მე ვაპირებ თბილისისთვის ბრძოლას და ამ არჩევნებში გამარჯვებას. ერთხელ და სამუდამოდ, ჩვენ უნდა გავისტუმროთ ქალაქიდან „ქართული ოცნება" და დავამსხვრიოთ ის მახინჯი ბიუროკრატიული სისტემა, რომელიც აი, ამ შენობაში არის გამეფებული. ეს ხალხი მართლაც წურბელებივით აზის თბილისელებს და მათი მთავარი ამოცანა არის არა თბილისელებზე ზრუნვა, არამედ ის, თუ რაც შეიძლება მეტი წაგლიჯონ და წაღლიტონ თბილისელებს საკუთარი კეთილდღეობისათვის. ციფრები არის შოკისმომგვრელი მართლაც. მხოლოდ სკუთარ თავზე და საკუთარ კეთილდღეობაზე თბილისის მერიისა და საკრებულოს მაღალჩინოსნებმა, ბოლო სამი წლის განმავლობაში, 235 მილიონი ლარი დახარჯეს. აქედან 137 მილიონი დახარჯულია ხელფასებზე, დანამატებზე და პრემიებზე. მადა თბილისის მერიაში მართლა ძალიან კარგი აქვთ. ერთ მილიონზე მეტი შეჭამეს, ამ სიტყვის პირდაპირი მნიშვნელობით - რესტორნებსა და ფურშეტებზე დახარჯულია მილიონზე მეტი. ეს იმ ფონზე, როდესაც 7 000 თბილისელს მოუხსნეს სოციალური დახმარება და ბოლო ლუკმა-პურის გარეშე დატოვეს და 40 000-მდე თბილისელი ყოვედღიურად ჩაწერილია უფასო სასადილოებში", განაცხადა ზაალ უდუმაშვილმა, რომლის თქმითაც, თბილისის მერიის 300-ზე მეტი ავტომანქანის საერთო ღირებულება, რომელიც დედაქალაქის მთავრობის მაღალჩინოსნებს ემსახურება, 5 მილიონზე მეტია.

„სხვა საკითხია კიდევ ის ავტომანქანები, რომლებიც თბილისის მერიის მაღალჩინოსნებს ემსახურება. 300-ზე მეტი ავტომანქანა ჰყავს მერიას, რომელთა საერთო ღირებულებაც 5 მილიონზე მეტს წარმოადგენს. დამისახელეთ ევროპაში ყველაზე დიდი  ქალაქი, სადაც მერიის მაღალჩინოსნებს ამ ავტომობილების ნახევარი მაინც ემსახურება და თბილისის მერიის ავტოპარკის შენახვა ბოლო სამ წელიწადში 4 მილიონზე მეტი დაჯდა. სწორედ, ამაზე ვსაუბრობ, როდესაც ვიძახი, რომ ბიუროკრატიული აპარატის შემცირებით, ჩვენ 100 მილიონზე მეტს დავზოგავთ წელიწადში და ეს თანხები მთლიანად მოხმარდება სოციალურ და ჯანდაცვის პროექტებს. თბილისელების ფული ოქტომბრიდან დაიხარჯება მხოლოდ და მხოლოდ თბილისელებზე. ამ ქალაქში ნარმანიას და კალაძის მმართველობის ადგილი არ არის", განაცხადა ზაალ უდუმაშვილმა.