პარლამენტის საგარეო ურთიერთობათა კომიტეტის თავმჯდომარე სოფიო ქაცარავა საქართველოში ლატვიის საგანგებო და სრულუფლებიან ელჩს, იანის ზლამეცს შეხვდა. ეს იყო გამოსამშვიდობებელი შეხვედრა, იანის ზლამეცს საქართველოში აკრედიტაციის ვადა ამოეწურა.

საქართველოს პარლამენტის პრესსამსახურის ცნობით, შეხვედრაზე ისაუბრეს ორ ქვეყანას შორის არსებული მეგობრული ურთიერთობების დინამიკისა და სხვადასხვა მიმართულებით ნაყოფიერი თანამშრომლობის შესახებ.

მხარეებმა ასევე ყურადღება გაამახვილეს „აღმოსავლეთ პარტნიორობის“ მნიშვნელობაზე და ნოემბერში დაგეგმილ „აღმოსავლეთ პარტნიორობის“ სამიტზე. საუბარი შეეხო ვიზალიბერალიზაციის საკითხს და ევროკავშირში ინტეგრაციის კუთხით საქართველოს მიერ მიღწეულ პროგრესს.

შეხვედრისას განიხილეს საქართველოს საკონსტიტუციო ცვლილებების საკითხი. ლატვიის ელჩმა პოზიტიურად შეაფასა ჩვენს ქვეყანაში მიმდინარე რეფორმები. „საქართველო დემოკრატიული განვითარების სწორ გზაზე დგას", აღნიშნა იანის ზლამეცმა.

იანის ზლამეცმა მადლიერება გამოხატა ქართული მხარის მიმართ, მიმდინარე წლის მარტში ლატვიის პარლამენტის სპიკერის და სკანდინავიისა და ბალტიის რვიანის წევრი ქვეყნების გულითადი მანპინძლობისთვის და ხაზი გაუსვა საორგანიზაციო ჯგუფის მაღალ პროფესიონალიზმს.

საგარეო ურთიერთობათა კომიტეტის თავმჯდომარემ, სოფიო ქაცარავამ ლატვიის ელჩს მადლობა გადაუხადა ორი ქვეყნის ურთიერთობების გაღრმავებაში შეტანილი წვლილისთვის და წარმატება უსურვა მას მომავალ საქმიანობაში.

„მინდა დიდი მადლობა გადაგიხადოთ გაწეული საქმიანობისთვის, რომელმაც მნიშვნელოვნად გააღრმავა საქართველოსა და ლატვიის ურთიერთობები სხვადასხვა მიმართულებით. გისურვებთ წარმატებას თქვენს მომავალ საქმიანობაში და დიდი იმედი მაქვს, რომ ჩვენი თანამშრომლობა კვლავ გაგრძელდება", განაცხადა მან შეხვედრის დასასრულს.