საქართველოს ვიცე პრემიერი, საგარეო საქმეთა მინისტრი მიხეილ ჯანელიძე, ბაქოში მიმდინარე საგარეო საქმეთა მინისტრების სამმხრივი (აზერბაიჯანი-საქართველო-თურქეთი) შეხვედრის ფარგლებში, თურქეთის საგარეო საქმეთა მინისტრს მევლუთ ჩავუშოღლუს შეხვდა.

საქართველოს საგარეო საქმეთა სამინისტროს ცნობით, მხარეები მიესალმნენ საქართველო-თურქეთის მეგობრულ ურთიერთობს და გამოხატეს მზადყოფნა კიდევ უფრო გააძლიერონ სტრატეგიული პატნიორობა და განავითარონ როგორც პოლიტიკური, ასევე ეკონომიკური თანამშრომლობა.

მიხეილ ჯანელიძემ მადლობა გადაუხდა თურქეთს ბორჯომისა და აბასთუმანის ხეობაში ხანძრის სალიკვიდაციო სამუშაოებში აქტიური დახმარებისთვის, ასევე საქართველოს ევრო-ატლანტიკური ინტეგრაციის და საქართველოს სუვერენიტეტისა და ტერიტორიული მთლიანობის მხარდაჭერისთვის.

„საგარეო უწყებების ხელმძღვანელებმა კმაყოფილებით აღნიშნეს სამმხრივი ფორმატის ფარგლებში წარმატებული თანამშრომლობა და ხაზი გაუსვეს ამ ფორმატის მნიშვნელობას რეგიონის განვითარების თვალსაზრისით.

შეხვედრაზე მხარეებმა ისაუბრეს თურქეთისა და საქართველოს ჩართულობით საერთაშორისო სატრანზიტო და ენერგეტიკული პროექტების მიმდინარეობაზე და გამოთქვეს მზადყოფნა მომავალშიც აქტიურად ითანამშრომლონ სამხრეთ ენერგეტიკული დერეფნის განვითარების თვასაზრისით.

მინისტრები მიესალმნენ საქართველოსა და თურქეთს შორის მაღალი სტრატეგიული თანამშრომლობის საბჭოს ფორმატში არსებულ ურთიერთობას, რომელიც საშუალებას იძლევა ქვეყნებმა მაღალ დონეზე განიხილონ ორმხრივი თანამშრომლობის მიმდინარეობა", აღნიშნულია საქართველოს საგარეო საქმეთა სამინისტროს მიერ გავრცელებულ ინფორმაციაში.