პოლონეთიდან უკრაინაში მატარებლით გამგზავრებამდე მიხეილ სააკაშვილმა საქართველოს „საზოგადოებრივი მაუწყებლის“ და ტელეკომპანია „იმედის“ ჟურნალისტების შეკითხვებზე პასუხების გაცემისაგან თავი შეიკავა და მათ „ივანიშვილის ჩვეულებრივი აგენტები“, ხოლო აღნიშნულ სატელევიზიო არხებს კი „ივანიშვილის დაქირავებული ცრუპენტელა არხები“ უწოდა.

„იმედის“ ჟურნალისტის მიერ დასმულ შეკითხვას, თუ რატომ გადაწყვიტა მატარებლით გამგზავრება უკრაინაში, სააკაშვილმა ასეთი პასუხი გასცა: „მე არ ვპასუხობ ოლიგარქის ტელევიზიას. ტელეკომპანია „იმედი“ მიმაჩნია ივანიშვილის კარის ტელევიზიად, ასე, რომ კარგად იყავით... მომიკითხეთ ივანიშვილი, კარგად მეყოლეთ, ველაპარაკები თავისუფალ მედიას“.

ჟურნალისტი: „ჩვენც თავისუფლები ვართ“.

სააკაშვილი: „თქვენ ისეთივე თავისუფლები ხართ, როგორც მე ვარ კიტრი“.

ჟურნალისტის მორიგ შეკითხვაზე, თუ რატომ არ აღმოჩნდა მათთვის ადგილი იმ ავტობუსში, რომლითაც იგი მგზავრობდა, სააკაშვილმა უპასუხა: „მე ვფიქრობ თქვენი ადგილი არის ივანიშვილის გვერდზე და იქეთ წაბრძანდით, ეხლა დამანებეთ თავი, ნუ უშლით ხალხს ხელს მუშაობაში, ნახვამდის“.

ჟურნალისტი: „მე ჩემს მოვალეობას ვასრულებ“.

სააკაშვილი: „მოვალეობას ასრულებთ ივანიშვილის მიმართ. მე თქვენ არ გპასუხობთ, ნახვამდის“.

ჟურნალისტი: „ჩვენ არ ვართ ჟურნალისტები?

სააკაშვილი: „არა, თქვენ ხართ ივანიშვილის ჩვეულებრივი აგენტები და ივანიშვილის დაქირავებული ცრუპენტელა არხები“.