უკრაინის შს მინისტრი არსენ ავაკოვი აცხადებს, რომ საქართველოს ყოფილმა პრეზიდენტმა, ოდესის ოლქის ყოფილმა გუბერნატორმა, მიხეილ სააკაშვილმა უკრაინაში შესვლა „შეგინის“ გამშვებ პუნქტზე ან საიმიგრაციო სამსახურში უნდა გააფორმოს.

შს მინისტრმა „ფეისბუქის“ პირად გვერდზე დაწერა, რომ „თითოეული პირი, რომელიც მონაწილეობდა საზღვრის გარღვევაში და მესაზღვრეებსა და პოლიციელებზე თავდასხმაში, პასუხს კანონის საფუძველზე აგებს".

„სააკაშვილმა და ყველამ, ვინც უკანონოდ გადაკვეთა საზღვარი ორი ვარიანტიდან ერთი უნდა აირჩიონ: მივიდნენ „შეგენის“ გამშვებ პუნქტზე და პროცედურები გაიარონ და/ან საიმიგრაციო სამსახურის დანაყოფს ეწვიონ“, განმარტავს ავაკოვი.

„საზღვრის გარღვევის ყველა მონაწილე, მათ შორის დეპუტატები, პოლიციაში უნდა მოვიდნენ ჩვენების მისაცემად“, განაცხადა უკრაინისი შს მინისტრმა.

არსენ ავაკოვი ამბობს, რომ სამართალდამცავებმა მთელი რიგი სამუშაოები გასწიეს იმისთვის, რომ გუშინ საზღვარზე დაპირისპირება და სისხლისღვრა არ მომხდარიყო.

უკრაინელმა სამართალდამცველებმა „საზღვრის უკანონო, დამამძიმებელ გარემოებებში გადაკვეთის" გამო, გამოძიება დაიწყეს.