ხონის მუნიციპალიტეტი „დავასუფთაოთ საქართველოს“ ყოველწლიურ საერთაშორისო კამპანიას შეუერთდა.

გამგეობის ცნობით, დასუფთავების მასშტაბურ აქციაში ადმინისტრაციული ერთეულების წარმომადგენლები, საჯარო მოხელეები, ა(ა)იპ-ები და მოხალისეები იღებდნენ მონაწილეობას.

კამპანია „დავასუფთაოთ მსოფლიო“ პროექტის - „დავასუფთაოთ საქართველო“ (ფაზა III) ფარგლებში ტარდება, რომელსაც არასამთავრობო ორგანიზაციათა კონსორციუმი – „საქართველოს მწვანეთა მოძრაობა/დედამიწის მეგობრები საქართველო“, საქართველოს ბუნების მკვლევართა კავშირი „ორქისი“ და „ეკოლოგიური ცნობიერების ამაღლება და ნარჩენების მართვა“ ახორციელებს.

პროექტი შვედეთის მთავრობის ფინანსური უზრუნველყოფით, გარემოსა და ბუნებრივი რესურსების დაცვის სამინისტროს მხარდაჭერით ხორციელდება.