საქართველოს ფეხბურთის ფედერაციის მიერ 29 სექტემბერს, „დინამო არენაზე“ დაგეგმილ საქველმოქმედო მატჩში - „მსოფლიოს ვარსკვლავები საქართველოსთვის“, სადაც ერთმანეთს მასპინძელი „GFF-11“ და „მსოფლიოს 11“ დაუპირისპირდებიან, მსოფლიო ვარსკვლავებთან ერთად კახა კალაძეც ითამაშებს.

„ქართული ოცნების“ თბილისის მერობის კანდიდატი აღნიშნულ შეხვედრაში მონაწილეობას „სასიამოვნოდ“ მიიჩნევს, რადგან, თვლის, რომ თუ რაიმე წარმატება გააჩნია, ეს ფეხბურთის დამსახურებაა.

„იურიდიულად იდგა საკითხი, შეიძლებოდა თუ არა მატჩში ჩემი მონაწილეობა, ვინაიდან საარჩევნო პერიოდში ვარ და ახლა დადასტურებულად შემიძლია გითხრათ, რომ მონაწილობას მივიღებ. მივესალმები იმას, რომ ეს შეხვედრა გაიმართება 29 სექტემბერს. მე მივიღებ მონაწილეობას, რაც ჩემთვის მართლაც სასიამოვნოა, რადგან ფეხბურთი ჩემთვის ყველაფერია. თუ რაიმე წარმატება გამაჩნია, თუ რაიმე შევქმენი, ამ სპორტის დამსახურებაა. ძალიან მიხარია, რომ ჩემი თანაგუნდელები, ადამიანები, რომლებთანაც ძალიან ბევრ წარმატებას მივაღწიე და მთელი წლის განმავლობაში ერთად ვთამაშობდით, ჩამოვლენ საქართველოში და მიიღებენ ამ მატჩში მონაწილეობას. მე რასაც გადავხედე, ძალიან ბევრი მსოფლიო დონის ფეხბურთელი და ვარსკვლავი ჩამოდის, რაც მე მგონია, რომ მისასალმებელი და კარგია. მე მთხოვეს დაკავშირება ამ ადამიანებთან. მე არავისთან კონტაქტი არ გამიწყვეტია, მეგობრული ურთიერთობები მაქვს. ვთხოვე, ეს იყო ჩემი ფუნქცია მხოლოდ“, განაცხადა კახა კალაძემ ჟურნალისტებთან საუბრისას.

თბილისს მსოფლიო ფეხბურთის ვარსკვლავები ესტუმრებიან, მათ შორის: ფრანჩესკო ტოტი, კარლეს პუიოლი, რივალდო, დიდა, ანდრეი შევჩენკო, ხავიერ ძანეტი, ზვონიმირ ბობანი, სერჟინიო, პაოლო მალდინი და სხვები.

საქველმოქმედო მატჩიდან შემოსული თანხა ბორჯომის ტყის დამწვარი ტერიტორიის აღდგენას მოხმარდება. ბილეთების ონალიან რეჟიმში საიტზე TKT.GE-ზე იყიდება.