„ქართული ოცნება - დემოკრატიული საქართველოს“ გურჯაანის მერობის კანდიდატმა, არჩილ ხანდამაშვილმა სოფელ მუკუზანში, სადაც ღვინის ქარხნასაც ესტუმრა და რთველშიც მიიღო მონაწილეობა, ამომრჩევლებს მიმართა და თქვა, რომ იგი არ იქნება მერი, რომელიც „ხალხს მხოლოდ არჩევნებისთვის ხვდება“.

ხანდამააშვილის თქმით, მუნიციპალიტეტს სოფლის მეურნეობის და ტურიზმის მიმართულებით განვითარების დიდი პოტენციალი აქვს, ამიტომაც, არჩევნებში გამარჯვების შემთხვევაში, ამ მიმართულებებით აქტიურად დაიწყებს მუშაობას.

„მე ამ მუნიციპალიტეტის სოფელ ვეჯინში დავიბადე და კარგად ვიცი როგორი მშრომელი ხალხიც ვართ, როგორი რუდუნებით ვუვლით თითოეულ ყურძნის მტევანს, როგორი წარმატება გველოდება ყველას ერთად თუ ჩვენ სწორად დავსახავთ ჩვენს პრიორიტეტებს და შესაბამისად ვიმოქმედებთ. მე ვიცი, გურჯაანს აქვს განვითარების დიდი პოტენციალი რამდენიმე მიმართულებით, განსაკუთრებით კი, სოფლის მეურნეობისა და ტურიზმის კუთხით“, აღნიშნა გურჯაანის მერობის კანდიდატმა, როგორც ეს GUARDIAN.GE-ს პარტიის პრესსამსახურიდან აცნობეს.