გერმანიის საპარლამენტო არჩევნები დასრულდა და მე-2 მსოფლიო ომის შემდეგ ბუნდესტაგში პირველად ულტრა-მემარჯვენე პარტია „ალტერნატივა გერმანიისთვის“ გავიდა.

„ალტერნატივა გერმანიისთვის“ ლიდერმა, ფრაუკე პეტრიმ „თვითერზე“ დაწერა, რომ გერმანიამ „შეუდარებელი პოლიტიკური მიწისძვრა“ განიცადა, ხოლო ამავე პარტიის თანათავმჯდომარემ, ალექსანდერ გაულანდმა განაცხადა: „ბრძოლა არ დასრულებულა“.

მეორე ადგილზე გასული „სოციალ-დემოკრატიული პარტიის“ ლიდერი მარტინ შულცი, რომელიც გერმანიის პოლიტიკაში აქტიურად ჩაბმამდე ევროპული ევროპარლამენტის პრეზიდენტი იყო, მადლობას უხდის მხარდამჭერებს და პარტიის თანამშრომლებს, და ყველა კანდიდატს, განსაკუთრებით კი ახალგაზრდა სოციალისტებს და აცხადებს, რომ იგი პარტიის თავმჯდომარის პოსტზე დარჩება.

კარგი შედეგები აჩვენეს უფრო მცირე პარტიებმა, რომელთაც გადალახეს ბუნდესტაგში მოსახვედრად საჭირო 5 პროცენტიანი ბარიერი და ამგვარად, გერმანიის პარლამენტში 6 პარტია იქნება წარმოდგენილი.

გერმანიაში ფედერალური არჩევნების პირველი ეგზიტ პოლები აჩვენებს, რომ ქვეყნის კანცლერის, ანგელა მერკელის ქრისტიან-დემოკრატიული პარტია და მისი შვილობილი, ბავარიული ქრისტიან-სოციალური პარტია მცირედით ლიდერობენ, ვიდრე ეს ნავარაუდევი იყო. 

პირველადი მონაცემებით, მათ ხმების ყველაზე მეტი რაოდენობა, 32.5% მიიღეს.

მხარდამჭერებისადმი მიმართვისას, ანგელა მერკელმა განაცხადა, რომ იგი „უკეთეს შედეგს“ მოელოდა. მან „საოცარი გამოწვევების“ შესახებ ისაუბრა. 

მმართველი კოალიციის მთავარი კონკურენტი მარტინ შულცის სოციალ-დემოკრატიული პარტია იყო, რომელიც მერკელის ქრისტიან-დემოკრატიული პარტიის კოალიციის პარტნიორია და მან ხმების 20% მიიღო.

მესამე ადგილზე გავიდა ულტრა-მემარჯვენე პარტია, "ალტერნატივა გერმანიისთვის", 13.5%-ით. 

საარჩევნო უბნები ადგილობრივი დროით დილის 08:00 საათზე გაიხსნა და 18:00 საათზე დაიხურა.