პარტია „ქართული ოცნება - დემოკრატიული საქართველოს“ გორის მერობის კანდიდატი კონსტანტინე თავზარაშვილი გორელ ბიზნესმენებს შეხვდა.

როგორც GUARDIAN.GE-ს პარტიის პრესსამსახურიდან აცნობეს, შეხვედრაში, რომელსაც გიორგი კანდელაკმა უხელმძღვანელა, ორგანიზაცია „გორელის“ წევრებმა და შიდა ქართლის გუბერნატორმა კახა სამხარაძემ მიიღეს მონაწილეობა.

პრესსამსახურის ინფორმაციით, კახა სამხარაძის განცხადებით მთავრობის ერთ-ერთ მთავარ მიზანს ქვეყნის ეკონომიკის გაძლიერება წარმოადგენს, რასაც გორში თავად შეუწყობს ხელს.

„მე იმ ოჯახის წევრი ვარ, რომელსაც „ქართული ოცნება“ ჰქვია და კარგად ვიცი, როგორ ზრუნავს ეს ოჯახი თქვენზე. მთელი გუნდი გვერდში ვუდგავართ კონსტანტინე თავზარაშვილს და ვიცით, რომ მისი მთავარი მიზანი გორისა და მისი მოსახლეობის განვითარებაა“, განაცხადა კახა სამხარაძემ.