პარტია „ქართული ოცნება - დემოკრატიული საქართველოს“ წყალტუბოს მერობის კანდიდატი გრიგოლ (გია) იოსელიანი სოფლების, ნამოხვანის, ოფურჩხეთის, ჯიმასტაროს, გუმათისა და ჟონეთის მოსახლეობას შეხვდა.

როგორც GUARDIAN.GE-ს პარტიის პრესსამსახურიდან აცნობეს, გრიგოლ იოსელიანმა ადგილობრივებს საარჩევნო პროგრამა გააცნო და სამომავლო გეგმებზე ისაუბრა.

მერობის კანდიდატთან ერთად, შეხვედრებზე, თვითმმართველი ორგანოების საქმიანობაში მოქალაქეთა აქტიურ ჩართულობაზე, წყალტუბოს საკრებულოს მაჟორიტარობის კანდიდატმა პაატა ახალაძემაც ისაუბრა.

„ჩვენს მუნიციპალიტეტს მდინარე რიონის სახით, უდიდესი ბუნებრივი რესურსი აქვს. ნამახვან ჰესის მშენებლობა მომავლის პროექტია, რომელიც 2018 წლიდან დაიწყება. კაშხლების მშენებლობის დასრულების შემდეგ, 443 მეგავატი სიმძლავრის ჰესი დამატებითი მოცულობის ენერგიას წარმოქმნის, რომელიც საქართველოს ენერგომომარაგებას სრულად მოხმარდება, რაც ქვეყნის ენერგოდამოუკიდებლობაში უდიდეს წვლილს შეიტანს“, განაცხადა გრიგოლ იოსელიანმა.

მისივე თქმით, გარდა იმისა, რომ აღნიშნული პროექტის ფარგლებში, მიმდებარე სოფლებში ინფრასტრუქტურა განვითარდება, ადგილობრივები დასაქმდებიან და დამატებითი შემოსავლის წყარო გაუჩნდებათ.

„დარწმუნებული ვარ, რომ მალე აქ ევროპული დონის სასოფლო დასახლებას ვიხილავთ“, განაცხადა მერობის კანდიდატმა სოფელ ნამოხვანში გამართულ შეხვედრაზე.