ბათუმში, საკრებულოს სხდომა ხმაურის ფონზე მიმდინარეობს. სიტყვიერი დაპირისპირება მოჰყვა საკითხის განხილვას, გადასცენ თუ არა კომპანია „ბიზნესდეველოპმენტს“ მიწის ნაკვეთები ბათუმის ბოტანიკური ბაღის სანაპირო ზოლსა და მწვანე კონცხის ნაწილზე.

ოპოზიციის ინფორმაციით, საუბარია ბოტანიკური ბაღის სანაპირო ზოლის 6 ათას კვ. ტერიტორიისა და 1500 კვ.მ მიწის ნაკვეთის ბიძინა ივანიშვილთან დაკავშირებულ კომპანია „ბიზნესდეველოპმენტისთვის" გადაცემაზე, რასაც საკრებულო 50-წლიანი იჯარით და აჭარის მთავრობის თანხმობით გეგმავს.

„ერთიანი ნაციონალური მოძრაობის" წარმომადგენლები საკითხის განსახილველ საკითხთა დღის წესრიგიდან მთლიანად ამოღებას ითხოვდნენ.

მათი თქმით, მიწის ნაკვეთების საჯარო რეესტრში რეგისტრაცია დღეს დილით განხორციელდა, ბათუმის საკრებულო კი, სწორედ ამას შემდეგ შეიკრიბა.

„საკითხი შემოვიდა დარღვევით, შესაბამისი ამონაწერები მას არ ახლდა. არ იყო გამოყოფილი და არ ვიცოდით რა მიწის ნაკვეთი უნდა გადაგვეცა. კომისიებმა განიხილეს ისე, რომ არ ვიცოდით რა მიწის ნაკვეთები უნდა გადაგვეცა. ბიურო ჩავატარეთ ისე, რომ ამონაწერი არ გვქონდა. და ახლა, 15 წუთის წინ, როგორც იქნა, საასწრაფო წესით მოახდინეს იუსტიციის სახლში მიწის ნაკვეთის გამიჯვნა. ამაზე მეტი დარღვევით საკითხის განხილვა გინახავთ?", განაცხადა „ერთიანი ნაციონალური მოძრაობის" ბათუმის რაიონული ორგანიზაციის თავმჯდომარემ, გიორგი კირთაძემ სხდომაზე.

მისი თქმით, „უნიკალური ბოტანიკური ბაღის ნაცვლად, რომლითაც არა მხოლოდ ბათუმელები, არამედ ყველა ვამაყობდით, გვექნება ბიძინა ივანიშვილის სასტუმროს ეზო“.

ქალაქ ბათუმის მუნიციპალიტეტის საკრებულოს თავმჯდომარის, ლაშა სირაბიძის განმარტებით კი, ეს არის, დაახლოებით, 3 მილიონის ინვესტიცია და ფართობის გადაცემის სანაცვლოდ, 2017 წლის ახალი მოდელის საბაგირო გაკეთდება.