პარტია „ქართული ოცნება - დემოკრატიული საქართველოს“ თელავის მერობის კანდიდატი შოთა ნარეკლიშვილი სოფლებს, ართანასა და ლალისყურს ესტუმრა და მოსახლეობას მაჟორიტარობის კანდიდატები ბესიკ გაიპარაშვილი და გიორგი ქიზიყელაშვილი წარუდგინა.

როგორც GUARDIAN.GE-ს პარტიის პრესსამსახურიდან აცნობეს, ადგილობრივებმა შეხვედრაზე ლალიყურის გაზიფიცირებასთან დაკავშირებული საკითხი დააყენეს და მერობის კანდიდატს სოფელში არსებული პრობლემების შესახებ ინფორმაცია მიაწოდეს.

მათივე ინფორმაციით, მოსახლეობამ მერობის კანდიდატს ყურძნის ფასებთან დაკავშირებით, სახელმწიფო და კერძო სექტორთან შუამდგომლობის საკითხში დახმარება სთხოვა, ასევე, მათ განსაკუთრებული ყურადღება სასმელი წყლის, საუბნო გზების, გარე განათების, სარწყავი და სანიაღვრე არხების გაწმენდა-კეთილმოწყობის საკითხების მოგვარებაზე გაამახვილეს.

„მოსახლეობას უდიდესი ძალა აქვს. ჩვენ უნდა მოგისმინოთ და თქვენი გადაწყვეტილებები განვახორციელოთ, რადგან ნებისმიერ ხელისუფლებას ლეგიტიმაცია ხალხის ნდობით აქვს მინიჭებული. ამდენად, თუ მმართველობის სადავეებს გვანდობთ, გპირდებით, რომ უპირველესად, თქვენს პრიორიტეტებს გავითვალისწინებთ და მომავალი ოთხი წლის განმავლობაში, ძალ-ღონეს არ დავიშურებთ იმ საკითხების გუნდურად მოსაგვარებლად, რაზეც დღეს ვსაუბრობთ“, განაცხადა შოთა ნარეკლიშვილმა.

პრესსამსახურის ცნობით, მერობის კანდიდატმა ასევე აღნიშნა, რომ მუნიციპალიტეტის მასშტაბით არსებული პრობლემების საკითხი ეტაპობრივად, თელავის მერიის კომპეტენციის ფარგლებში გადაწყდება.