რუსეთის 2/3-ზე მეტი მოქალაქე ქვეყნის მოქმედ პრეზიდენტს, ვალდიმერ პუტინს მისცემდა ხმას, საპრეზიდენტო არჩევნები შემდეგ კვირა დღეს რომ ტარდებოდეს. პირველ სამეულში ასევე შევიდნენ ЛДПР-ის ლიდერი ვლადიმერ ჟირინოვსკი და КПРФ-ის ლიდერი გენადი ზუგანოვი.

„რია ნოვოსტის“ ცნობით, გამოკითხვა ფონდმა, „საზოგადოებრივი აზრი“ ჩაატარა.

სოციოლოგიური კვლევის თანახმად, პუტინს რუსეთის მოქალაქეების 67% მისცემდა ხმას, თუკი არჩევნები უახლოეს კვირა დღეს ჩატარდებოდა. 2016 წლის პირველ კვარტალში ანალოგიური პასუხი 71%-მა მისცა, მეორე კვარტალში 64%-მა და მას მერე ეს პროცენტული მაჩვენებელი 60-67%-ს შორის მერყეობს.

მეორე და მესამე ადგილებზე ჟირინოვსკი (7%) და ზუგანოვი (4%) არიან. რესპონდენტების მხოლოდ 8%-მა განაცხადა, რომ არჩევნებზე არ მივიდოდა, 2%-მა თქვა, რომ გადახაზავდა ბიულეტენს, ხოლო 9%-ს პასუხის გაცემა გაუჭირდა. 1%-იანი მხარდაჭერა აქვთ მილიარდერ მიხეილ პროხოროვს და „სამართლიანი რუსეთის“ ლიდერს, სერგეი მირონოვს.

გამოკითხვა 23-24 სექტემბერს ჩატარდა და სულ 3 000 მოქალაქე გამოიკითხა. სტატისტიკურად ცდომილება 3.6%-ზე მეტს არ შეადგენს.