ჩვენ არ შევეგუებით იმას, რომ ერთ ლარად გადაეცეს ბიძინა ივანიშვილს ნახევარი თბილისი, აღნიშნული განცხადება „ერთიანი ნაციონალური მოძრაობის" თბილისის მერობის კანდიდატმა, ზაალ უდუმაშვილმა ცოტა ხნის წინ გამართულ საგანგებო ბრიფინგზე გააკეთა.

მერობის კანდიდატის თქმით, „შევიკრიბეთ იმიტომ, რომ მკაფიოდ ვუთხრათ „ქართული ოცნების“ ხელისუფლებას და მის უკან მდგარ ბიძინა ივანიშვილს, რომ არ დავუთმობთ ბოტანიკურ ბაღს, არ შევარჩენთ, რომ მისი „პანორამა თბილისი" ამახინჯებდეს თბილისის ისტორიულ ნაწილს".

საგანგებო ბრიფინგზე ზაალ უდუმაშვილმა აქცია დააანონსა, რომელიც 2 ოქტომბერს, 14:00 საათზე თბილისის მერიასთან გაიმართება.

„დღეს, აქ ჩვენ განსაკუთრებული მიზეზით შევიკრიბეთ. იმ მომენტიდან, როდესაც ჩვენ გავაკათეთ განაცხადი, რომ მონაწილეობას ვიღებდით თვითმმართველობის არჩევნებში, გადავწყვიტეთ, რომ ბოლომდე დაგვეცვა თბილისელების ინტერესები. და ეს არ არის წინასაარჩევნო რიტორიკა, ეს ჩვენი ცხოვრების საქმეა.... ჩვენ არ ვაპირებთ ფარ-ხმალის დაყრას არჩევნებამდე, არჩევნებში გამარჯვების შემდეგ, ბუნებრივია, ყველა ის უკანონო გადაწყვეტილება გაბათილდება, რომელიც თბილისის წინააღმდეგ იყო მიმართული. ჩვენი პროტესტი იქნება უფრო მრავალრიცხოვანი, უფრო ძლიერი და უფრო ხმამაღალი, ამიტომ, ჩვენ დღეს აქ ვაანონსებთ აქციას - ორშაბათს, 14:00 საათზე, თბილისის მერიასთან და  ვიწვევთ ყველას, ვინც მხარს გვიჭერს და ვინც მხარს უჭერს თბილისს, ჩვენ საერთო სახლს", განაცხადა ზაალ უდუმაშვილმა.