ყოფილი დებუტატისა და იურისტის ვალერი გელბახიანის განცხადებით, მართალია, ხელისუფლებამ არ აღიარა, მაგრამ ნათელია, რომ მინისტრთა კაბინეტში ბოლო დროს განხორციელებული ცვლილებები ჩინოვნიკების საქმიანობაში არსებულ დანაშაულის ნიშნებს უკავშირდება.


გელბახიანმა ეს, გაზეთ ,,ახალ თაობასთან“ საუბრისას განაცხადა.


,,ხელისუფლებამ ოფიციალურად არ აღიარა, რომ გარკვეული ჩინოვნიკების საქმიანობაში დანაშაულის ნიშნებს ჰქონდა ადგილი. აღიარება არ მოხდა, მაგრამ ნელ-ნელა დაიწყო ამ კადრების განთესვა საპასუხისმგებლო თანამდებობებიდან. ამ სიტუაციას ვაკვირდებოდი და სწორედ აქედან გამომდინარე ვთქვი, რომ შავლიაშვილის შემდეგ გადადგომის შესახებ განცხადებას ხოკრიშვილი დაწერდა“,- აცხადებს გელბახიანი.


მისივე მოსაზრებით, შემდეგი, ვინც თანამდებობიდან გადადგომის შესახებ განცხადებას დაწერს, გაცილებით მსხვილი ფიგურა იქნება.


,,ღარიბაშვილის გარშემო წრე რომ ვიწროვდება, ამას ყველა ამჩნევს. ასე, რომ, გამორიცხული არ არის, მანაც საკუთარი სურვილით დატოვოს თანამდებობა. თუმცა, ასეთი რამეები მთლად საკუთარი სურვილით არ ხდება, აქ ფარული ხელი მუშაობს. მხედველობაში ბიძინა ივანიშვილი მყავს. მართალია, ის არ აღიარებს, მაგრამ ის ამ პროცესებში აქტიურად არის ჩართული“,- აღნიშნავს ყოფილი დეპუტატი.


ამასთან, გელბახიანი ვარაუდობს, რომ პრემიერის თანამდებობისთვის ინფრასტრუქტურის ახლადდანიშნულ მინისტრ ნოდარ ჯავახიშვილს ამზადებენ.


,,ჯავახიშვილი ამ თანამდებობას ყველაზე მეტად იმსახურებს. ის შევარდნაძის ხელისუფლებაში ერთადერთი არაკორუმპირებული ჩინოვნიკი იყო. ის შეუვალი და პრინციპული ადამიანია, მასთან ჩაწყობა არ მოდის. ასეთი კაცი მინისტრად შემთხვევით არ მოდის. თუ პრემიერის პოსტი ვაკანტური გახდა, სწორედ ჯავახიშვილი უნდა იქნას ამ პოსტზე წარდგენილი. იმედია, ამას გაითვალისწინებს ის ადამიანი, ვინც ქვეყანას რეალურად მართავს“,- განაცხადა ვალერი გელბახიანმა.