ხონში იპოლიტე ხვიჩიას ძეგლი გაიხსნა. შეკრებილ საზოგადოებას სიტყვით მიმართეს გაზეთ „ხონელის“ რედაქტორმა ჯემალ გორდულაძემ, პოეტმა თინათინ ჭელიძემ და ისტორიკოსმა ავთანდილ ფაილოძემ. მათ ცნობილი მსახიობის ცხოვრებისა და ღვაწლის შესახებ ისაუბრეს.

გამგეობის ცნობით, დღესვე, ხონში, იმერეთის გუბერნატორის ადმინისტრაციის, მუნიციპალიტეტის გამგეობისა და იპოლიტე ხვიჩიას სახელობის ეროვნული აკადემიის ორგანიზებით, იპოლიტე ხვიჩიას სახელობის ქართული იუმორის ფესტივალი გაიმართა, რომელშიც მონაწილეობა იმერეთის მუნიციპალიტეტების იუმორისტულმა ჯგუფებმა მიიღეს.

„გამოვლინდნენ პირველი, მეორე და მესამე ადგილის მფლობელი გუნდები. ფესტივალის მთავარი პრიზი სამტრედიის მუნიციპალიტეტს ერგო. გამარჯვებულებს ფულადი თანხა და საჩუქრები გადაეცათ.

მუნიციპალიტეტის გამგებლის ჯემალ მებუკის სიტყვით გამოსვლის დროს ცნობილი გახდა, რომ ხონის კულტურის ცენტრს იპოლიტე ხვიჩიას სახელი მიენიჭება და დიდი კომიკოსის სახელობის ფესტივალს ყოველწლიურად სწორედ მისი მშობლიური ქალაქი უმასპინძლებს. ჯემალ მებუკემ მადლობა გადაუხადა კონსტანტინე ესტატეს ძე ჩხენკელის სახელობის ხონის კულტურული აღორძინების ფონდს, რომლის ფინანსური მხარდაჭერითაც გახდა შესაძლებელი იპოლიტე ხვიჩიას ძეგლის დამზადება“, აღნიშნულია ხონის მუნიციპალიტეტის გამგეობის მიერ გავრცელებულ ინფორმაციაში.