საპარლამენტო უმრავლესობის წევრებმა, თამაზ ნავერიანმა და რუსლან გაჯიევმა, მარნეულის მე–19 და მე–20 მაჟორიტარულ ოლქებში „ქართული ოცნება - დემოკრატიული საქართველოს“ მერობის კანდიდატი თემურ აბაზოვი, საკრებულოს დეპუტატობის კანდიდატი ამირან გიორგაძე და ოლქის მაჟორიტარობის კანდიდატები - რამინ ალახვერდიევი და ტარიელ მამედოვი წარადგინეს.

პარტიის პრესსამსახურის ცნობით, მმართველი პარტიის წარმომადგენლებმა შეკრებილ მოსახლეობას სიტყვით მიმართეს და მომავალი გეგმების შესახებ ისაუბრეს. მერობის კანდიდატმა ამომრჩეველს წინასაარჩევნო პროგრამა გააცნო და ადგილობრივი საჭიროებების შესახებ ინფორმაცია მოისმინა.

„ჩემთვის დიდი პატივი და პასუხისმგებლობაა ვიყო მარნეულის მუნიციპალიტეტის მერობის კანდიდატი. მარნეული მულტიეთნიკური მუნიციპალიტეტია, სადაც მშვიდობიანად, ურთიერთპატივისცემით ცხოვრობენ სხვადასხვა ეთნიკური და რელიგიური თემის წარმომადგენლები. სწორედ ტოლერანტული თანაცხოვრების კიდევ უფრო გაღრმავებისა და განმტკიცების გარანტი ვიქნები მარნეულის მუნიციპალიტეტში. მსურს ჩემი შესაძლებლობები, გამოცდილება, ენერგია და ენთუზიაზმი მოვახმარო მარნეულს და ქვეყნის განვითარებას”, განუცხადა აბაზოვმა მხარდამჭერებს.