„თუ დავით ნარმანია არ მოდის ხალხთან, მაშინ ხალხი მივა დავით ნარმანიასთან“, აღნიშნული განცხადება, „ნაციონალური მოძრაობის“ თბილისის მერობის კანდიდატმა, ზაალ უდუმაშვილმა მერიასთან მიმდინარე აქციაზე გააკეთა.

უდუმაშვილის თქმით, საკრებულოს და პარლამენტის დეპუტატები თავად შევლენ თბილისის მერიაში და მოითხოვენ პასუხს კითხვაზე, „თუ რას აპირებს მერია საკრებულოს მიერ ბიძინა ივანიშვილისთვის გადაცემულ მიწის ნაკვეთებთან დაკავშირებით".

„ჩვენი საკრებულოს დეპუტატები და პარლამენტის წევრები შეეცდებიან, რომ შევიდნენ, დაელაპარაკონ და პირადად მოისმინონ ხალხის გადაწყვეტილება. არ შეიძლება ხალხის ასე იგნორი. მე დიდ ბოდიშს ვუხდი თბილისელებს იმისთვის, რომ ახლა ქუჩა გადაკეტილია, თუმცა, საცობი თბილისელებს დიდად არ უკვირთ. ახლა მნიშვნელოვანი საკითხი წყდება თბილისისთვის. კერძოდ ის, რომ თბილისი რიგდება ნაწილ-ნაწილ და ნამდვილად არ მივცემთ ბიძინა ივანიშვილს, კახი კალაძეს იმის საშუალებას, რომ თბილისი გადაინაწილონ. ახლა მოვითხოვთ, რომ კეთილი ინებონ და გამობრძანდნენ და გვითხრან რას აპირებენ", განაცხადა ზაალ უდუმაშვილმა.