დევნილთა და განსახლების მინისტრმა სოზარ სუბარმა და დმანისის მაჟორიტარმა დეპუტატმა კახაბერ ოქრიაშვილმა დმანისის მუნიციპალიტეტის ამომრჩეველს „ქართული ოცნება - დემოკრატიული საქართველოს“ მერობის კანდიდატი გიორგი ტატუაშვილი წარუდგინეს და მოსახლეობას მხარდაჭერისკენ მოუწოდეს.

მოსახლეობის ასევე სიტყვით მიმართეს გარდაბნისა და მარნეულის მაჟორიტარმა დეპუტატებმა სავალან მირზოევმა და რუსლან გაჯიევმა.

„მოგეხსენებათ, რომ „ქართულმა ოცნებამ“ ნდობა გამომიცხადა და დმანისის მერობის კანდიდატად დამასახელა. დიდი პასუხისმგებლობაა ვიყო იმ გუნდის კანდიდატი. „ქართული ოცნება“ საშუალებას მაძლევს, ჩემი ცოდნა და გამოცდილება მოვახმარო მშობლიურ კუთხეს, ვემსახურო იმ ხალხს, რომელმაც გამზარდა. განსაკუთრებული ემოციები მაკავშირებს დმანისთან. ჩემი ცხოვრების წარმატების გზის დასაწყისი სწორედ ამ ლამაზ, ძირძველ და ისტორიულ ადგილს უკავშირდება. მინდა საკუთარი წვლილი შევიტანო დმანისის განვითარებაში, ეკონომიკურ აღმავლობასა და გაძლიერებაში. მინდა თქვენთან ერთად ახალი სიცოცხლე შევძინო ჩვენს ულამაზეს კუთხეს და მისი განახლება და წინსვლა შეუქცევად პროცესად ვაქციო. მე ბავშვობიდან კარგად ვიცნობ აქაურების ცხოვრებას, ვიცნობ პრობლემებს, რომლებიც ამ კუთხეს აწუხებს, კარგად ვიცი მოსახლეობის საჭიროებები. ვიცი, როგორ უნდა გახადო საქმიანობა წარმატებული, როგორ მიაღწიო სასურველ შედეგსა და წარმატებას. ზუსტად განსაზღვრო და შეაფასო გამოწვევები და პრობლემის არსი. ჩემს პოლიტიკურ გუნდთან ერთად მე შევძლებ გავაკეთო საქმე, რომელიც სჭირდება ჩვენი ქვეყნის, ჩვენი მუნიციპალიტეტის წინსვლას, განვითარებას, პროგრესს, სტაბილურობას, უსაფრთხოებას, სანდოობას, თითოეული ჩვენგანის კეთილდღეობას. თქვენი გვერდში დგომით, მხარდაჭერით და ჩართულობით ჩვენ ყველა პრობლემის დაძლევას შევძლებთ. ჩვენ ერთად შევძლებთ გავხადოთ დმანისი მომავალზე ორიენტირებული. მე მაქვს თქვენი მხარდაჭერის იმედი. ჩვენ ერთად მოვიპოვებთ ამ გამარჯვებას“, განაცხადა მერობის კანდიდატმა.