თერჯოლის მერობის კანდიდატი „ქართული ოცნება-დემოკრატიული საქართველოდან“ ბონდო სოფრომაძე მის მშობლიურ სოფელ რუფოთში სოფრომაძეების უბნის მოსახლეობას შეხვდა და უთხრა, რომ ის დაბრუნდა იმიტომ, რომ მისი ცოდნა და გამოცდილება მშობლიურ სოფელს და რაიონს მოახმაროს.

„მე თქვენს წინაშე არ მოვსულვარ დაპირებებით, რადგან არ მჭირდება თქვენს წინაშე თავის წარდგენა. აქ მოვედი იმისათვის, რომ ჩემი მშობლიური უბნიდან თერჯოლისა და მთელი საქართველოს გასაგონად ვთქვა: „ქართულ ოცნებასთან ერთად, მე ვიქნები თქვენ გვერდით და მხარს დავუჭერ მუნიციპალიტეტისათვის სასიკეთო ყველა წამოწყებას.

„თქვენ იცით, დღევანდელი მმართველი პოლიტიკური გუნდისათვის მთავარი ღირებულება ადამიანია. მთავრობის ყველა ინიციატივა - იქნება ეს ჯანდაცვის საყოველთაო დაზღვევა თუ გლეხისა და სოფლის მეურნეობის განვითარების ხელშეწყობა, აგროკრედიტები, მცირე და საშუალო ბიზნესის დაფინანსება, სახელმწიფო თუ ადგილობრივი მნიშვნელობის ინფრასტრუქტურული პროექტები - სწორედ ჩვენი მოქალაქეობის კეთილდღეობისკენაა მიმართული. მე ვიქნები თქვენი მხარდამჭერი და თქვენამდე ყველა იმ სიკეთის მომტანი, რასაც სახელმწიფო გვთავაზობს. მე დავბრუნდი იმიტომ, რომ ჩემი ცოდნა, ჩემი გამოცდილება მოვახმარო ჩემს მშობლიურ სოფელს, ჩემს რაიონს და ამისთვის ძალას და ენერგიას არ დავიშურებ. ჩემს გუნდთან ერთად 24 საათი ვიქნები თქვენს სამსახურში, ყველაფერს გავაკეთებ თერჯოლის სწრაფი განვითარებისათვის“, განაცხადა მოსახლეობასთან შეხვედრისას მერობის კანდიდატმა ბონდო სოფრომაძემ, როგორც ამას მერობის კანდიდატის პრესსამსახური იტყობინება.