ავსტრალიის ორ უდიდეს ქალაქში რამდენიმე ათწლეულში ტემპერატურამ შესაძლოა 50C-ს მიაღწიოს, ნათქვამია კვლევაში.

როგორც BBC იუწყება, მეცნიერების თქმით, ზაფხულის პერიოდში ასეთი მაღალი ტემპერატურა სიდნეის და მელბურნს მაშინაც კი ემუქრება, თუკი პარიზის შეთანხმებით გლობალური დათბობის შედეგად ტემპერატურის ზრდა 2C-ზე დაბლა იქნება შეჩერებული.

ავსტრალიის ეროვნული მეტეოროლოგიური ბიუროს ცნობით, სიდნეიში 2013 წელს სიცხის რეკორდული მაჩვენებელი, 45.8C დაფიქსირდა, მელბურნში კი 46.4C - 2009 წელს.

კვლევამ ამინდის პროგნოზი მხოლოდ ვიქტორიასა და ნიუ საუს ვეილსისთვის გამოიკვლია, მაგრამ მკვლევარებმა თქვეს, რომ ტემპერატურის მატება ავსტრალიის დანარჩენ ნაწილებშიცაა მოსალოდნელი.

„გლობალურად ერთ-ერთი ყველაზე ცხელი წელი - 2015-ში - შესაძლოა საშუალო წელი იყოს 2025-სთვის“, განაცხადა კვლევის ხელმძღვანელმა, ავსტრალიის ეროვნული უნივერსიტეტის დოქტორმა, სოფი ლუისმა.

კვლევა, რომელშიც მელბურნის უნივერსიტეტიცაა ჩართული, და რომელიც სამეცნიერო ჟურნალ „Geophysical Research Letters“-ში გამოქვეყნდა, ამბობს, რომ კლიმატის ცვლილების შესახებ ქმედებების განხორციელება არსებით გამოწვევად რჩება.

თუკი გლობალური დათბობა 2C-ით მოხდა, დოქტორი ლუისი აცხადებს, რომ ავსტრალიის მთავარ დიდ ქალაქებში 2040 წლიდან 2050 წლებში ტემპერატურამ შესაძლოა 50C-ს მიაღწიოს.

ქვეყნის დამოუკიდებელი კლიმატის საბჭოს თანახმად, ავსტრალიის ბოლო ზაფხული განსაკუთრებული სიცხით გამოირჩეოდა და ასწლეულების რეკორდი მოხსნა, მაშინ როცა ზამთარი ყველაზე თბილი იყო.

გასულ თვეს ავსტრალიელები გააფრთხილეს, რომ 2017-18 წლის სეზონზე უკონტროლო ტყისა და ბუჩქების ხანძრებისთვის მოემზადონ.