კატალონიაში მყოფმა ესპანეთის მთავრობის წარმომადგენელმა, კვირას ქუჩებში დამოუკიდებლობის რეფერენდუმის მხარდასაჭერად გამოსულ დაზარალებულ კატალონიელებს ბოდიში მოუხადა.

თუმცა, ენრიკ მილომ კატალონიის მთავრობა არაკანონიერი რეფერენდუმის ჩატარებისთვის დაადანაშაულა.

მადრიდის მთავრობამ გამოსცა დადგენილება, რის მიხედვითაც კომპანიებს გაუადვილდებათ თავიანთი სამმართველო ცენტრების კატალონიიდან გადატანა.

კატალონიის მინისტრმა BBC-სთან საუბრისას განაცხადა, რომ მთავრობა კატალონიის  დამოუკიდებლობის განხილვას პარლამენტში აპირებს.

„პარლამენტი განიხილავს, და პარლამენტი დააკმაყოფილებს“, განაცხადა კატალონიის საგარეო საქმეთა ხელმძღვანელმა, რაულ რომევამ. "ესპანეთი ყოველთვის ცდილობდა ხელი შეეშალა მოვლენების განვითარებისთვის, მაგრამ ეს მცდელობები როგორც ფუჭი, ასევე კონტრპროდუქტიული იყო", განაცხადა მან BBC-სთან საუბრისას.

კატალონიის პრეზიდენტი, კარლე პუჩდემონი ესპანეთის პარლამეტს სამშაბათს მიმართავს.

ესპანეთის სასამართლომ ორშაბათს დაგეგმილი სხდომა გადაავადა. არის მოსაზრება, რომ პარლამენტი დამოუკიდებლობას ცალმხრივად გამოაცხადებს, სადავო კენჭისყრის საფუძველზე, რომელიც ესპანეთის კანონის მიხედვით არალეგალურად არის გამოცხადებული.

ესპანეთის პრემიერ მინისტრი, მარიანო რაჰოი კატალონიასთან დაპირისპირების შესახებ სხდომის გამართვას აპირებს.

ამავდროულად, კატალონიის პოლიციის მეთაური, ჯოზეფ ლუის ტრაპერო სახელმწიფოს წინააღმდეგ ამბოხებისკენ მოწოდების ბრალდებით სასამართლოს წინაშეა წარდგენილი.

მის „მოსოს დესქუადრას“ ძალებს ბრალი ედებათ იმაში, რომ 1-ელ ოქტომბერს, დამოუკიდებლობის რეფერენდუმის კენჭისყრის დროს, მარცხი განიცადეს ესპანეთის ეროვნული პოლიციის პროტესტანტებისაგან დაცვაში.

კატალონიის პოლიციის ხელმძღვანელის გარდა, ეჭვმიტანილების სახით ერთი ოფიცრისა და დამოუკიდებლობის ორი წამყვანი აქტივისტის დაკითხვა მიმდინარეობს.

კატალონიის პოლიციის ხელმძღვანელმა და სამმა პირმა, შეზღუდვების გარეშე დატოვა ესპანეთის სასამართლო. ჯერჯერობით უცნობია, რა განუცხადეს მათ მოსამართლეს.

წამყვანი გაზეთი „ელ პაისი“ აცხადებს, რომ „მოსოსის“ წინააღმდეგ ბრალდებები პოსტ-ფრანკოს დემოკრატიულ ესპანეთში უჩვეულო ამბავია.

აგვისტოში, „მოსოსი“ ფართოდ იქნა შექებული ბარსელონაში „ისლამური სახელმწიფოს“ ქსელის მიერ მოწყობილ ტერორისტულ თავდასხმასთან გამკლავების გამო.

კვირას გამართული ხმის მიცემის ორგანიზატორებმა განაცხადეს, რომ კენჭისყრაში მონაწილეობა 2.2 მილიონმა ადამიანმა მიიღო და კატალონიის დამოუკიდებლობას ხმა მონაწილეთა 90%-მა მისცა, თუმცა საბოლოო შედეგები ჯერ გამოქვეყნებული არაა.

კვირას გამართული აქციის დროს, ხმის მიცემის პუნქტებში პოლიცია შეიჭრა, ბიულეტენების ყუთების წაღება და ხალხის დაშლა სცადა, რის შედეგადაც ასობით აქტივისტმა მიიღო ფიზიკური დაზიანებები.

ესპანეთის მთავრობა უარს ამბობს კატალონიის დამოუკიდებლობის მოთხოვნაზე. კატალონიელი ლიდერების თქმით, მათ სჭირდებათ საერთაშორისო შუამავლობა და სთხოვენ ევროკავშირს, ჩაერიოს ამ დაპირისპირებაში.

კატალონია რიცხვებში:

• ესპანეთის მოსახლეობის 16% კატალონიაში ცხოვრობს.
• კატალონიას ესპანეთის ექსპორტის 25.6% უკავია.
• კატალონიაზე ესპანეთის მშპ-ს (მთლიანი შიდა პროდუქტი) 19% მოდის.
• კატალონიაზე უცხოური ინვესტიციების 20.7% მოდის.