ცნობილი ქართველი ექიმი, აკადემიკოსი ფრიდონ თოდუა ხანგრძლივი ავადმყოფობის შემდეგ გარდაიცვალა. ინფორმაცია კლინიკური მედიცინის სამეცნიერო-კვლევითი ინსტიტუტის (თოდუას კლინიკის) დირექტორმა გიორგი წივწივაძემ დაადასტურა.

იგი 1944 წელს ზუგდიდში დაიბადა. 1968 წელს დაამთავრა თბილისის სახელმწიფო სამედიცინო ინსტიტუტის სამკურნალო ფაკულტეტი. 1968-1991 წწ მუშაობდა ა.ა. ვიშნევსკის სახ. ქირურგიის ინსტიტუტში, სადაც კარიერა რიგითი ექიმობიდან დაიწყო და წამყვანი განყოფილების ხელმძღვანელის თანამდებობით დაასრულა. 

1991 წ. თბილისში დააარსა დიაგნოსტიკური ცენტრი, რომელსაც შემდგომში კლინიკური მედიცინის სამეცნიერო კვლევითი ინსტიტუტის სტატუსი მიენიჭა და გარდაცვალებამდე მისი უცვლელი დირექტორი იყო.

იგი გახლდათ მედიცინის მეცნიერებათა დოქტორი (1984), პროფესორი (1989), საქართველოს მეცნიერებათა აკადემიის აკადემიკოსი (2001). 1995 წლიდან გარდაცვალებამდე „საქართველოს რადიოლოგთა ასოციაციის“ და „ტელემედიცინის ასოციაციის“ პრეზიდენტი, საქართველოს სამედიცინო აკადემიის აკადემიკოსი იყო.

ფრიდონ თოდუა ევროპის, ამერიკისა და რიგი საერთაშორისო რადიოლოგიური და ქირურგიული ასოციაციების წევრი, ასევე, საქართველოს სწავლულ ექსპერტთა საბჭოს, მეცნიერებისა და ტექნიკის დარგში სახელმწიფო პრემიების მიმნიჭებელი კომიტეტის, სახელმწიფო სამედიცინო აკადემიის პროფესორთა საბჭოს, ჯანმრთელობის სამინისტროს მრჩეველთა საბჭოს, სამედიცინო ეთიკის და სხვა მრავალი საბჭოსა და კომისიის წევრი იყო.

ფრიდონ თოდუა 500-ზე მეტი სამეცნიერო ნაშრომის, 8 მონოგრაფიის და 15 გამოგონების ავტორი, 200-ზე მეტი საერთაშორისო სამეცნიერო ფორუმის მონაწილე, 15 სადოქტორო და 44 საკანდიდატო დისერტაციის სამეცნიერო ხელმძღვანელი იყო.