ამერიკის შეერთებული შტატების პრეზიდენტმა დონალდ ტრამპმა შეერთებული შტატები შესაძლოა „მესამე მსოფლიო ომის გზაზე“ გაუყენოს, განაცხადა სენატის საგარეო ურთიერთობების კომიტეტის თავმჯდომარემ, „რესპუბლიკელმა“ ბობ კორკერმა.

მან თქვა, რომ ტრამპი პრეზიდენტობას „რეალითი შოუს“ მსგავსად ეპყრობა.

ტენესელმა კანონმდებელმა ასევე განაცხადა, რომ თეთრი სახლის თანამშრომლები იბრძვიან, რომ „შეაკავონ“ ტრამპი.

როგორც BBC წერს, კორკერის კომენტარები უჩვეულო თავდასხმაა მოქმედ პრეზიდენტზე მისი საკუთარი პარტიის წევრისაგან.

კორკერის კანდიდატურა გასულ წელს ტრამპის მიერ სახელმწიფო მდივნის პოსტზე განიხილებოდა, მაგრამ მას შემდეგ მათი გზები გაიყარა.

სენატორმა „ნიუ იორკ თაიმსს“ სატელეფონო ინტერვიუში უთხრა, რომ იგი შეწუხებულია პრეზიდენტის ქცევით.

„მე არ ვფიქრობ, რომ იგი აღიქვამდეს იმას, რომ როცა ამერიკის შეერთებული შტატების პრეზიდენტი საუბრობს და ამბობს ისეთ რაღაცებს, რასაც ამბობს, გავლენა აქვს მსოფლიოს გარშემო, განსაკუთრებით რეგიონში, რომელსაც ის მიმართავს“, განაცხადა სენატორმა.

კორკერმა მიანიშნა, რომ პრეზიდენტმა - რომელმაც არაერთხელ გააბრაზა ბირთვული შეიარაღების მქონე ჩრდილოეთ კორეა - შესაძლოა შეერთებული შტატები „,მესამე მსოფლიო ომის“ გზაზე გაუყენოს.

„მე არ ვიცი, თუ რატომ წერს პრეზიდენტი ‘თვითერზე’ ისეთ რამეებს, რაც არ არის სიმართლე“, დაამატა მან.

„იცით, რომ ის ამას აკეთებს, ყველამ იცის , რომ ის ამას აკეთებს, მაგრამ ის მაინც აკეთებს“.

„დანამდვილებით ვიცი, რომ თითოეული დღე თეთრ სახლში, არის სიტუაცია, როცა ცდილობენ მის შეკავებას“, უთხრა კორკერმა გაზეთს.

კორკერის აღნიშნულ კომენტარებს წინ უძღოდა ტრამპის „თვითერზე“ გაკეთებული განცხადება, რომლის მიხედვითაც კორკერი ევედრებოდა პრეზიდენტს მხარი დაეჭირა მის ხელახლა არჩევაში.

ტრამპმა თქვა, რომ მან უარი განაცხადა. ის კორკერს ასევე ბრალს სდებს იმაში, რომ იგი „დიდწილადაა პასუხისმგებელი ირანთან დადებულ საშინელ შეთანხმებაზე“.