პარტია „ქართული ოცნება - დემოკრატიული საქართველოს“ აბაშის მერობის კანდიდატი ლევან მაკალათია საარჩევნო კამპანიის ფარგლებში, პარტიული სიის პირველ ნომერ მამუკა კვიტაშვილთან ერთად, შპს „მექანიზატორის“ თანამშრომლებს შეხვდა.

პარტიის პრესსამსახურის ცნობით, მერობის კანდიდატმა იმ მიმართულებებსა და საკითხებზე ისაუბრა, რომელიც მისი მერად არჩევის შემთხვევაში პრიორიტეტული იქნება.

მან ერთ-ერთ მთავარ პრიორიტეტად სოფლის მეურნეობის განვითარება და ხელშეწყობა დაასახელა.

ლევან მაკალათიამ აღნიშნა, რომ ის ყველაფერს გააკეთებს იმისთვის, რათა ხელი შეუწყოს აბაშის სოფლების განვითარებას, სოფლად მცხოვრები მოსახლეობის კეთილდღეობის გაუმჯობესებასა და სოფლის მეურნეობის პოტენციალის გაზრდას.

„ურთიერთთანამშრომლობითა და ერთიანი ძალებით, შევძლებთ, არსებული პრობლემების გადაწყვეტასა და ჩვენი რაიონის კიდევ უფრო განვითარებას. საქართველოს მთავრობა სასოფლო ბიზნესის წახალისების მიზნით, სხვადასხვა პროექტებს ახორციელებს. მათ შორისაა, მექანიზაციის პროგრამა, რაც სოფლის მეურნეობის განვითარებისათვის უმნიშვნელოვანესია“, განაცხადა მერობის კანდიდატმა.

ლევან მაკალთიამ შპს „მექანიზატორის“ ტექნიკა დაათვალიერა და სასოფლო-სამეურნეო სამუშაოების მომსახურებისთვის საჭირო ტექნიკის მდგომარეობით დაინტერესდა.