თბილისის საკრებულოს გადაწყვეტილებას, რომლითაც პუშკინის სკვერის მიმდებარე მიწის ნაკვეთი და თაბორის მთის ტერიტორიის ნაწილი გასხვისდა, „ერთიანი ნაციონალური მოძრაობა“ აპროტესტებს და აცხადებს, რომ არ დაუშვებს ივანიშვილის კომპანიისთვის ტერიტორიების 1 ლარად გადაცემას.

„ნაციონალები“ მეტრო "რუსთაველთან" შეიკრიბნენ და რუსთაველის გამზირის გავლით სოლოლაკში, ბიძინა ივანიშვილის საცხოვრებელი სახლისკენ მიემართებიან. მათი მთავარი ლოზუნგია ასეთია: „გავერთიანდეთ თბილისის გადასარჩენად“.

აღნიშნულ თემაზე მორიგი კომენტარი გააკეთა თბილისის მერმა, დავით ნარმანიამ.

„ეს იყო ერთ ლარად გადაცემა ერთი მილიონი ლარის ინვესტირების მიზნით და არა ვინმესთვის საჩუქრად გადაცემა. ეს არის ძალიან მნიშვნელოვანი და მნიშვნელოვანია ის, რომ აქ კეთდება საპარკინგე ადგილი, რომელიც ქალაქს ძალიან სჭირდება და ასეთი არაერთი დატვირთული უბანი გვაქვს და მომავალშიც არაერთი პარკინგი გაკეთდება ქალაქში“, განაცხადა ნარმანიამ მედიასთან საუბრისას.

„ერთიანი ნაციონალური მოძრაობის“ აქციასთან დაკავშირებით დასმული შეკითხვის საპასუხოდ კი თბილისის მერმა თქვა, რომ იმ პოლიტიკური ძალის მიერ აქციების გამართვა, რომელსაც მისი მმართველობის დროს საჩუქრად უამრავი ტერიტორია აქვს გაცემული, „ძალიან სასაცილოა“.

„მათთი მმართველობის დროს ძალიან ბევრი ტერიტორია საჩუქრად გადაეცათ ვიღაცებს და ეს ვიღაცები არიან მათი მმართველობის დროს არაერთი ცალკეული მაღალი რანგის ჩინოვნიკები. ასე რომ, მათი მხრიდან ასეთი აქციის გამართვა ძალიან სასაცილოა“, აღნიშნა ნარმანიამ.