სოლოლაკში, საქართველოს ყოფილი პრემიერ მინისტრის, ბიძინა ივანიშვილის საცხოვრებელ სახლთან შეკრებილმა „ნაციონალური მოძრაობის“ ლიდერებმა მოუწოდეს ივანიშვილს „არ გაბედოს“ 21 ოქტომბრის ადგილობრივი არჩევნების გაყალბება.

ისინი აცხადებენ, რომ 21 ოქტომბერს დაასრულებენ „ფაროსანა ივანიშვილის მმართველობას“. მათ ივანიშვილის რეზიდენციასთან პლაკატები წარწერით - „ფაროსანა“- გააკრეს. 

პარტიის ერთ-ერთმა ლიდერმა, თბილისის მერობის კანდიდატმა, ზაალ უდუმაშვილმა მხარდამჭერებს უთხრა, რომ ივანიშვილის სოლოლაკის სასახლესთან მივიდნენ „იმისთვის, რომ ერთი კვირის წინ დაკანონებული ავტოფარეხი წავართვათ ბიძინა ივანიშვილს“.

„ჩვენ ახლა ვიმყოფებით ამ ქვეყნის მთავარ ფაროსანასთან, რომელიც მართლაც შემოსეულია საქართველოზე... არ ჰყოფნით ის, რაც მიიტაცეს ამ 5 წლის განმავლობაში, რაც წაღლიტეს ქართველ ხალხს, ახლა უკვე გადავიდნენ თბილისის ისტორიულ ნაწილებზე და თბილისის მთავარ რეკრეაციულ ზონებზე. მართლაც ფაროსანასავით შემოესიენ ამ ქვეყანას და ცდილობენ წაღლიტონ მაქსიმალურად მეტი. ეს უნდა დავამთავროთ 21 ოქტომბერს. ერთხელ და სამუდამოდ, ქართველმა ხალხმა უნდა უთხრას არა იმ აღვირახსნილობას, იმ ბანდიტიზმს, რასაც ქართული ოცნება აკეთებს დღეს საქართველოში. არავის ეგონოს, რომ დავთმობთ პუშკინის სკვერს. ჩვენ აქ მოვედით იმისთვის, რომ ერთი კვირის წინ დაკანონებული ავტოფარეხი წავართვათ ბიძინა ივანიშვილს და მას იქ, ისევ პუშკინის სკვერი დაერქვას“, განაცხადა ზაალ უდუმაშვილმა მხარდამჭერების წინაშე სიტყვით გამოსვლისას.