„თბილისის მერობის კანდიდატის, კახა კალაძის საარჩევნო პროგრამა შვიდ ძირითად მიმართულებას მოიცავს და შვიდივე ერთნაირად პრიორიტეტულია“, პარლამენტის პრესსამსახურის ცნობით, ასე აფასებს ირაკლი კობახიძე კახა კალაძის საარჩევნო პროგრამას.

ირაკლი კობახიძემ აღნიშნულ საკითხთან დაკავშირებით განცხადება თბილისის მერობის კანდიდატსა და ბიზნესსექტორის წარმომადგენლებს შორის გამართული შეხვედრის შემდეგ გააკეთა.

„აქ საუბარია იმ პრობლემებზე, რომელიც აწუხებს თბილისსა და თბილისის მოსახლეობას და საუბარია ამ პრობლემების გადაჭრის გზებზე. თითოეული ეს მიმართულება არის პრიორიტეტული“, აღნიშნა პარლამენტის თავმჯდომარემ.

მისივე თქმით, ეკონომიკურ პოლიტიკასთან დაკავშირებით, კახა კალაძეს კონკრეტული გეგმები აქვს წარმოდგენილი.

„განსაკუთრებული ყურადღება დაეთმო, რა თქმა უნდა, ეკონომიკურ პოლიტიკას, სადაც აქვს ძალიან კონკრეტული გეგმები წარმოდგენილი კახა კალაძეს, მათ შორის არის წარმოდგენილი პროექტები, რომელიც უნდა განხორციელდეს ბიზნეს სექტორთან ძალიან მჭიდრო თანამშრომლობით და მე დარწმუნებული ვარ, რომ ეს პროექტი თბილისს მოუტანს ძალიან სწრაფ განვითარებას“, განაცხადა ირაკლი კობახიძემ.