პოლიციამ ბრაზილიაში განაცხადა, რომ მათ ლათინური ამერიკის ისტორიაში პედოფილების წინააღმდეგ ყველაზე დიდი ოპერაცია ჩაატარეს. როგორც BBC იუწყება, ოპერაციის ფარგლებში, რომელშიც 1000-ზე მეტი პოლიციელი იყო ჩართული, ეჭვმიტანილები 24 შტატში და დედაქალაქ ბრაზილიაში დააკავეს.

იუსტიციის მინისტრმა, ტოქუატო ჯარდიმმა განაცხადა, რომ დაკავებულები იმ დანაშაულებრივი რგოლის წარმომადგენლები არიან, რომლებიც კომპიუტერების და მობილური ტელეფონების მეშვეობით ბავშვების პორნოგრაფიულ ფოტოებს აზიარებდნენ.

ოპერაციას წინ უძღოდა 6-თვიანი გამოძიება, რომელშიც ჩართული იყვნენ შეერთებული შტატების და ევროპის საიმიგრაციო ოფიციალური პირები.

გამომძიებლებმა 150 000-ზე მეტი ფაილი აღმოაჩინეს, რომლებიც შემაშფოთებელ ფოტოებს შეიცავდა.

BBC-ის ცნობით, დაკავებულთა შორის პენსიაზე გასული პოლიციელები, სამოქალაქო სფეროს მოსამსახურეები და ფეხბურთის ახალგაზრდული კლუბების ხელმძღვანელები არიან. მათ სპეციფიურ ვებგვერდზე მიუწვდებოდათ ხელი, რომელში შეღწევაც უმეტესობისთვის ხელმისაწვდომი არ არის.

ჯარდიმმა განაცხადა, რომ პედოფილები დახვეწილ ტექნიკას იყენებენ იმისათვის, რომ თავი აარიდონ პოლიციის საგამოძიებო მოქმედებებს.

„ისინი ინახავენ თავიანთ არალეგალურ, კრიმინალურ ფოტოებს ვინმეს კომპიუტერში ქვეყნის სხვა ნაწილში ან საზღვარგარეთაც კი“, თქვა მან.

„და ხშირად ადამიანები, რომლებიც ამ შინაარსის მასალებს ინახავენ, ამის საქმის კურსში არ არიან“, დაამატა ჯარდიმმა.

ოპერაციის სამიზნე თავდაპირველად ის ეჭვმიტანილები იყვნენ, რომლებიც არალეგალურ პედოფილურ მასალებს აზიარებდნენ, მაგრამ ათეულობით კომპიუტერში, მობილურ ტელეფონში, და CDs-ის მყარ დისკზე შეღწევის შემდეგ, გამომძიებლებმა აღმოაჩინეს, რომ კრიმინალური ჯგუფი ინტერნეტში გასავრცელებლად პორნოგრაფიულ მასალებსაც აწარმოებდა.

ფაილები მცირეწლოვანი ბავშვების და მოზარდების შემაშფოთებელ ფოტოებს და მათდამი სასტიკ მოპყრობას შეიცავდა.

ამ ეტაპზე უცნობია, პედოფილთა რგოლი ბრაზილიაში დამოუკიდებლად მოქმედებდა, თუ საზღვარგარეთ სხვა კრიმინალურ ქსელებთან კავშირში იმყოფებოდა.