ელ-ვახატის რაიონში ტერორისტებთან ბრძოლაში ეგვიპტის შინაგან საქმეთა სამინისტროს 58 თანამშრომელი დაიღუპა, მათ შორის 23 ოფიცერი და 35 რიგითი, იტყობინება ახალი ამბების პორტალი „მასრავი“ ქვეყნის შინაგან საქმეთა სამინისტროს წყაროზე დაყრდნობით.

„ალ-ჯაზირას“ ინფორმაციით კი მოკლულია 52 და დაჭრილია 6 პოლიციელი.

ახალი ამბების სააგენტო „რია ნოვოსტის“ ცნობით, დაღუპულები ეროვნული უსაფრთხოების და ცენტრალური უსაფრთხოების განყოფილებებში, ასევე სპეცდანიშნულების რაზმში მსახურობდნენ. მოკლულთა შორის არიან ელიტური სპეცნაზის წევრები, რომელთაც ტერორისტულ დაჯგუფებებთან ბრძოლის უზარამზარი გამოცდილება გააჩნდათ.

უფრო ადრე გავრცელებული ინფორმაციის თანახმად კი, სულ მცირე 30 პოლიციელი და სამხედრო პირი იყო მოკლული ეგვიპტის დედაქალაქ ქაიროს სამხრეთ-დასავლეთით მდებარე მებრძოლთა თავშესაფრებზე განხორციელებული რეიდისას.

„დოიჩე ველეს“ ცნობით, ბრძოლებს პარასკევს, დასავლეთ უდაბნოში, ბაჰარიას ოაზისში, ქაიროდან სამხრეთ-დასავლეთით დაახლოებით, 135 კილომეტრის მოშორებით ჰქონდა ადგილი და ის მას შემდეგ წარიმართა, რაც უსაფრთხოების ძალებმა მებრძოლთა ადგილმდებარეობის შესახებ მიიღეს ინფორმაცია.

შინაგან საქმეთა სამინისტრომ განაცხადა, რომ მოკლული არიან პოლიციელები, ისევე როგორც მებრძოლები, მაგრამ სამინისტროს მსხვერპლის რაოდენობა არ დაუკონკრეტებია.

თავშესფარში „ჰასმის“ მებრძოლები იმყოფებოდნენ და სწორედ ამ დაჯგუფებამ აიღო პასუხისმგებლობა თავდასხმაზე, განაცხადა რა, რომ მათ მიერ პოლიციის და უსაფრთხოების ძალების 28 წარმომადგენელია მოკლული და სხვა 32 დაჭრილი.

ეგვიპტის ხელისუფლება „ჰასმს“ ბრალს სდებს იმაში, რომ ის „მუსლიმთა საძმოს“ – 2013 წელს კანონგარეშედ გამოცხადებული ისლამური დაჯგუფის - მებრძოლი ფრთაა. „მუსლიმთა საძმო“ კი, უარყოფს ბრალდებას.