რამდენიმე საათი დარჩა, რომ თბილისში, თბილისის მოქალაქეების მშვიდობიანი ნების გამოხატვით, ჩვენ მოვიტანოთ სასიკეთო ცვლილებები თბილისში, შევცვალოთ „ქართული ოცნება" და მოვიტანოთ თბილისში განვითარება, აღნიშნული განცხადება „ევროპული საქართველოს" თბილისის მერობის კანდიდატმა, ელენე ხოშტარიამ ცოტა ხნის წინ გამართულ ბრიფინგზე გააკეთა.

მისი თქმით, „ქართული ოცნება" შეშინებულია. „დღეს, ჩვენ მთელი დღე ვუყურებთ შეშინებულ „ქართულ ოცნებას", შეშინებულ კანდიდატს „ქართული ოცნების", აღნიშნა მერობის კანდიდატმა.

ხოშტარიას განცხადებით, მიმდინარეობს ადმინისტრაციული რესურსის გამოყენება, პირადი მონაცემების აღრიცხვა, არის მობილიზაცია უბნებათან.

„ძალით მოჰყავთ არჩევნებზე ხალხი. მათ ესმით, რომ ისინი აგებენ არჩევნებს და ეს ერთადერთზე მეტყველებს, რომ „ქართული ოცნება" არ არის დღეს ძლიერი. იმისთვის, რომ ეს საქმე მივიყვანოთ ბოლომდე, იმისთვის, რომ თბილისში „ქართულმა ოცნებამ" აგოს პასუხი უამრავ ტყუილზე, რომელიც უთხრა თბილისის მოსახლეობას, მე მოვუწოდებ ყველა ჩემს მომხრეს, ყველა ოპოზიციურ ამომრჩეველს, არ დაიზაროთ, მობრძანდით საარჩევნო უბნებზე, გამოხატეთ თქვენი ნება. ეს არის ჩვენი შანსი, რომ მივცეთ განვითარება ამ ქალაქს", განაცხადა ბრიფინგზე ელენე ხოშტარიამ.