ავტოსაგზაო შემთხვევა ხაშურთან - საფეხბურთო კლუბ საჩხერის „ჩიხურას" კუთვნილი მიკროავტობუსი გზის სავალი ნაწილიდან გადავარდა და ამოტრიალდა.

„რუსთავი 2"-ის ინფორმაციით, შემთხვევის შედეგად დაშავდა ფეხბურთელი შოთა კაშია, რომელიც გადაყვანილია საავადმყოფოში და ამ წუთებში ოპერაცია უტარდება.

„დაუდგინდა მარჯვენა ლავიწის ძვლის სამხრე ბოლოს მოტეხილობა, მცირე ცდომით და ჩაუტარდა ოპერაცია ლავიწის ძვლის ოსტეო სინთეზი. ოპერაცია მთავრდება, ჩაიარა ნორმალურად, სხვა დაზიანებები პაციენტს არ აქვს. სიცოცხლისათვის საშიში ნამდვილად არ არის, გამომდინარე იქიდან, რომ პაციენტი არის სპორტსმენი, გაჭირდება ალბათ გარკვეულწილად რეაბილიტაცია, ამას მომავალი გვიჩვენებს", განაცხადა ტრავმატოლოგიური ჰოსპიტლის სამედიცინო დირექტორმა, ბუბა შალამბერიძემ.

საჩხერის „ჩიხურას” დირექტორის ინფორმაციით, მიკროავტობუსის მძღოლმა საჭის დამორჩილება ვერ შეძლო. ბერიკა შუკაკიძის თქმით, მცირე დაზიანება აქვს მიღებული კიდევ ერთ ფეხბურთელს, თუმცა მისი ჰოსპიტალიზება საჭირო არ გამხდარა.

„ბრუნდებოდნენ ფეხბურთელები გუნდის კუთვნილი ავტობუსით და ხაშურთან მძღოლმა ვერ შეძლო საჭის დამორჩილება, რადგან ტრასაზე, როგორც ის ამბობს, იყო წყლის ნაკადი, მოცურდა მანქანა და ხრამში ჩავარდა. დაშავებულია საბედნიეროდ მხოლოდ ერთი ფეხბურთელი, გუნდის კაპიტანი შოთა კაშია, რომელსაც ამ წუთებში ოპერაცია ლავიწის ძვალზე უტარდება. მცირე დაზიანება მიიღო ბაჩანა ცხადაძემ, მაგრამ ვესაუბრე და ის კარგად გრძნობს თავს", განაცხადა ბერიკა შუკაკიძემ.