„ეხო მასკვის“ ჟურნალისტზე, ტატიანა ფელგენგაურზე თავდასხმა ავადმყოფმა ადამიანმა განახორციელა, განაცხადა რუსეთის პრეზიდენტმა, ვლადიმერ პუტინმა ადამიანის უფლებების საბჭოს სხდომაზე.

„თქვენ ახსენეთ „ეხო მასკვი“, მაგრამ ეს აქ რა შუაშია? ავადმყოფი ადამიანი მოვიდა, რა შუაშია აქ სიტყვის თავისუფლება? ჩამოვიდა ისრაელიდან, თავს დაესხა ამ ჟურნალისტს. „ეხო მასკვი“ სახელმწიფო ფულით მუშაობს. ასეთი რამ მსოფლიოს არც ერთ ქვეყანაში არ არსებობს. თქვენ შეიძლება წარმოიდგინოთ, რომ ევროპაში იყოს (მსგავსი) რადიოსადგური? ან შტატებში? შეუძლებელია“, განაცხადა პუტინმა, რომლის სიტყვის ციტირებასაც სააგენტო „რია ნოვოსტი“ ავრცელებს.

ერთი კვირის წინათ, რუსეთის და ისრაელის მოქალაქე ბორის გრიცი რადიოსადგურ „ეხო მასკვის“ რედაქციაში შეიჭრა და ფელგენგაუერს ყელში დანა გაუყარა, რის შემდეგაც ის დააკავეს. ჟურნალისტი საავადმყოფოში გადაიყვანეს. სასამართლოზე გრიცმა ნაწილობრივ აღიარა თავისი ბრალეულობა და განაცხადა, რომ არ აპირებდა წამყვანის მოკვლას.

საგამოძიებო სამსახურს განზრახული აქვს ისრაელიდან სამედიცინო დოკუმენტაციის გამოთხოვა გრიცის შესახებ, რომელიც იქ დიდი ხნის განმავლობაში ცხოვრობდა. თავდამსხმელი ადრე ამტკიცებდა, რომ ჟურნალისტი მას „ტელეპატიური კონტაქტის“ მეშვეობით „ორი თვის განმავლობაში დევნიდა“. მისი ფსიქიკური მდგომარეობა კითხვის ნიშნის ქვეშაა, დანიშნულია სასამართლო-ფსიქიატრიული ექსპერტიზა.