ექპერტ მამუკა არეშიძის განცხადებით, უკეთესი იქნებოდა, თუ სამთავრობო ცვლილებები ეკონომიკურ გუნდსაც შეეხებოდა, რადგან მოსახლეობა მათი მუშაობით უკმაყოფილოა. ამის შესახებ მამუკა არეშიძემ გაზეთ ,,კვირის პალიტრასთან“ საუბრისას განაცხადა.


,,სამთავრობო ცვლილებებზე ლაპარაკის დაწყებისთანავე სახელისუფლებო კაბინეტებიდან სხვადასხვა ინფორმაცია ჟონავდა. ლაპარაკი იყო, რომ იცვლებოდა არა ორი მინისტრი, არამედ რამდენიმე, მათ შორის ეკონომიკური გუნდის წევრებიც, აქცენტი კეთდებოდა განსაკუთრებით ფინანსთა მინისტრის შეცვლაზე. აშკარაა, რომ ეს არის საზოგადოების მოთხოვნა და ამ მოთხოვნის გათვალისწინებაზე ხელისუფლებაში ფიქრობდნენ“,- აცხადებს არეშიძე.


ექსპერტის შეფასებით, ამ ნაბიჯის გადადგმა სრულიად ლოგიკური იქნებოდა, რადგან მიუხედავად ხელისუფლების წარმომადგენელთა მტკიცებისა ეკონომიკურ წარმატებებზე, საზოგადოებაში ამის ნაკლებად სჯერათ.


ამასთან, პოლიტოლოგი აღნიშნავს, რომ თუ არსებული სიტუაცია არ შეიცვალა, გამორიცხული არაა, ქვეყანა პოლიტიკურ კრიზისამდე მივიდეს.


მისი თქმით, ამ მდგომარეობის გათვალისწინებით არც ვადამდელი საპარლამენტო არჩევნების დანიშვნაა გამორიცხული.



,,ვფიქრობ, მთავრობის ეს შემადგენლობაც დროებითი უნდა იყოს. ქვეყანაში ყველა მიმართულებით კრიზისი მწიფდება, თუ ყველაფერი ასე გაგრძელდა, ვშიშობ, პოლიტიკურ კრიზისამდე არ მივიდეთ. შედეგად, არ არის გამორიცხული, დღის წესრიგში დადგეს რიგგარეშე არჩევნები.


უამრავი პრობლემის გადაჭრაზე ფიქრისა და ზრუნვის ნაცვლად დაკავებული ვართ პოლიტიკანობითა და შიდაპარტიული დაპირისპირებებით“,- აღნიშნავს მამუკა არეშიძე.